Кешкі сағат сегізге дейін сабақ: ақтаулық ата-аналар сабақтың кеш аяқталатынына шағымданды

Кейбір мектептерде сабақ 20:20-ге дейін, ал басқаларында - 19:55, тағы бір мектепте - 19:00-ге дейін болады екен. Айтуларынша, мектептерде сабақтың ұзақтығы да әртүрлі – 40-45 минут аралығы, деп хабарлайды mangystaumedia.kz

Мысалы, Ақтау қаласындағы N2мектепте сабақ 45 минутқа созылады, екінші ауысым сағат 14:15-те басталады. Сәйкесінше, сабақтар 20:20-да аяқталады екен. Сол себепті балалар үйге кеш жетеді.

«Мектеп орналасқан шағын ауданда тұрмайтын балалар бар, олар үйге әдетте кешкі тоғызда келеді. Ұйқы режимі мен нормасы да бұзылады. Барлық мамандар бірауыздан мектеп оқушысы сағат 9-да немесе кешкі сағат тоғыз жарымда ұйқыға жатуы керек екенін айтады. Мынадай жағдайда қандай дұрыс ұйқы болмақ? Айталық, егер бала 9-да келсе, ол тамақ ішіп, демалып, үй тапсырмасын түн ортасына дейін жасайды, өйткені олар таңертең сабаққа дейін спортпен айналысуы керек. Күнтізбелік жоспарды қайта қарастыруын сұраймыз», - дейді оқушылардың ата-аналары.

Қалалық білім бөлімі қолданыстағы заңнамаға сәйкес сабақ ұзақтығы 45 минут екенін атап өтті. Бірақ
екінші тоқсанда құзырлы органдармен келісе отырып, күннің қысқаруына және ауа райының салқын болуына байланысты сабақ ұзақтығын 40 минутқа дейін өзгерту мәселесі қарастырылады.

«Бүгінде үш ауысымда оқитын мектептер мен оқушылар орны тапшы мектептерде қамқоршылық кеңестің шешімімен 40 минуттан сабақ өтуде», - деп хабарлады қалалық білім бөлімі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.