Қарақиялық ерікті жастар елге көмек көрсетеді

Қарақия жастар ресурстық орталығы жанынан гуманитарлық көмек жинау орталығы ашылды, - деп хабарлайды mangystaumedia.kz.

Еліміздің бірнеше өңірінде орын алған табиғи апат - су тасқынынан зардап шеккендерге көмек көрсету мақсатында жан - жақты шаралар ұйымдастырылып, гуманитарлық көмек беру бекеттері ашылып жатыр. Соның бірі - Қарақия жастар ресурстық орталығы жанынан ашылған гуманитарлық көмек жинау орталығы.

Ауданның ерікті жастары қолға алған қайырымдылық шарасының мақсаты, эвакуациялық пункттерде орналасқан тұрғындарға күнделікті қажет заттармен көмектесу.

– Су тасқынынан зардап шеккендер ауданымызға да келіп, орналасып жатыр. Кешенің өзінде 134 адам орналасты, тағы да келетіні сөзсіз. Біз жастар болып осы пунктке азық-түлік пен гигиеналық құралдар сияқты ең қажет деген заттарды жинап беріп, өз көмегімізді көрсеткіміз келеді. Күнделікті азық-түлік, дәнді дақыл, макарон өнімдері, сұйық май, құс еті, жеміс-жидек пен көкөністер, тәтті-печенье т.б заттар да артық болмас еді, – дейді жастар орталығының басшысы Алибек Оразбек.

Айта кетелік, су тасқынынан зардап шеккендер үшін материалдық және гуманитарлық көмектерді қабылдайтын орталықтар тәулік бойы жұмыс істейді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.