Халықтың санитариялық-эпидемиологиялық саламаттылығы саласында көрсетілетін мемлекеттік қызметтер

1. Халықтың санитариялық-эпидемиологиялық саламаттылығы саласында қандай мемлекеттік қызметтер көрсетіледі?

Цифрлық даму, инновациялар және аэроғарыш өнеркәсібі министрінің м.а. 2020 жылғы 31 қаңтардағы № 39/НҚ бұйрығымен бекітілген Мемлекеттік көрсетілетін қызметтер тізіліміне сәйкес Департамент және аумақтық басқармалармен келесідей мемлекеттік қызметтер көрсетілуде:

Эпидемиялық мәні жоғары объектінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытынды беру (мемлекеттік қызметті Департаменттің аумақтық басқармалары көрсетеді).

Қоршаған ортаға зиянды заттар мен физикалық факторлардың жол берілетін шекті шығарындылары мен жол берілетін шекті төгінділері, санитариялық қорғау аймақтары мен санитариялық-қорғаныш аймақтары бойынша нормативтік құжаттама жобаларының, шикізат пен өнімнің жаңа түрлерінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытынды беру (мемлекеттік қызметті Департамент және аумақтық басқармалар көрсетеді.

Халықтың санитариялық-эпидемиологиялық саламаттылығы саласындағы мемлекеттік бақылау мен қадағалауға жататын тамақ өнімін өндіру объектісіне есепке алу нөмірін беру (мемлекеттік қызметті Департаменттің аумақтық басқармалары көрсетеді).

Патогенді биологиялық агенттермен жұмыс істеуге рұқсатты және оған қосымшаны беру (мемлекеттік қызметті санэпидбақылау Департаменті көрсетеді).

Халықтың санитариялық-эпидемиологиялық саламаттылығы саласындағы маман сертификатын беру (мемлекеттік қызметті санэпидбақылау Департаменті көрсетеді).

2024 жылғы 1 шілдеден бастап Денсаулық сақтау саласында дезинфекциялау, дезинсекциялау, дератизациялау бойынша қызметтер көрсетуге лицензия беру басталады (мемлекеттік қызметті санэпидбақылау Департаменті көрсететін болады).

2.Жиі және көбірек қандай мемлекеттік қызмет түрлерін алу үшін өтініштер түседі?

Мемлекеттік қызметтер электрондық форматта, яғни "электрондық үкімет" www.egov.kz, www.elicense.kz веб-порталы арқылы көрсетіледі.

2023 жылы облыс бойынша халықтың санитариялық-эпидемиологиялық саламаттылығы саласында мемлекеттік қызмет көрсетуге Е-лицензиялау порталы арқылы 1724 өтініш түскен. Соның ішінде 773 өтініші эпидемиялық мәні жоғары объектілерге санэпидқорытынды беру бойынша, 575 өтініші жобаларға санэпидқорытынды беру бойынша. Яғни осы 2 мемлекеттік қызмет түрлері жиі көрсетіледі.

2024 жылдың 5 айында Департамент және аумақтық басқармалармен Е-лицензиялау порталы арқылы 528 өтініш қаралып, оның 407-не рұқсат құжаттары, 121-не дәлелді бас тартулар берілген.

Мемлекеттік қызмет көрсету талаптары салалық қандай нормативтік құжаттармен реттелген?

Денсаулық сақтау министрінің «Халықтың санитариялық-эпидемиологиялық саламаттылығы саласындағы мемлекеттік қызметтерді көрсетудің кейбір мәселелері туралы» 2020 жылғы 30 желтоқсандағы № ҚР ДСМ-336/2020 бұйрығымен реттелген.

Сонымен қатар, маман сертификатын беру Денсаулық сақтау министрінің 2020 жылғы 15 желтоқсандағы № ҚР ДСМ-274/2020 бұйрығына сәйкес жүргізіледі.

Электрондық түрде е-лицензиялау порталы арқылы сіздің мекемеге мемлекеттік қызметтен басқа хабарламалар да жолданады. Жолданатын хабарламалар туралы айтып өтсеңіз?

«Рұқсаттар және хабарламалар туралы» 2014 жылғы 16 мамырдағы № 202-V ҚРЗ Заңына сәйкес е-лицензиялау порталы арқылы Департаментке және аумақтық басқармаларға келесідей хабарламалар жолданады:

- Эпидемиялық маңыздылығы болмашы объекті қызметінің басталғаны және тоқтатылғаны (оларды пайдалану) туралы хабарлама (эпидемиялық мәні болмашы объектілер тізбесі Қазақстан Республикасы Денсаулық сақтау министрінің 2020 жылғы 30 қарашадағы № ҚР ДСМ-220/2020 бұйрығымен бекітілген);

- Санитариялық-эпидемиологиялық аудит жүргізу жөніндегі қызметтің басталғаны немесе тоқтатылғаны туралы хабарлама;

- Халықтың декреттелген тобын гигиеналық оқыту жөніндегі қызметтің басталғаны немесе тоқтатылғаны туралы хабарлама.

Матаева Карлыгаш Болатбаевна,

Маңғыстау облысының санитариялық-эпидемиологиялық бақылау департаменті басшысының орынбасары