Елімізде алғаш рет ауылдық мектеп оқушыларына арналған пәндік олимпиада басталды

© Baq.kz

Елімізде тұңғыш рет ауылдық жерлердегі мектеп оқушыларына арналған жалпы білім беретін пәндерден республикалық олимпиада басталды. Оған облыстағы 97 мектептен 5863 оқушы тіркелді, деп хабарлайды mangystaumedia.kz сайты.

Бүгін еліміздің барлық ауылында бір мезетте ауыл мектептерінің оқушыларына арналған жалпы білім беретін пәндер бойынша республикалық олимпиаданың ашылу салтанаты өтті.

Аталған олимпиадаға Маңғыстау бойынша ең көп оқушы Мұнайлы ауданынан тіркелген, 1935 оқушы. Жаңаөзеннен – 1144, Ақтаудан – 60, Бейнеуден – 830, Қарақия ауданынан – 597, Маңғыстау ауданынан – 668 және Түпқарағаннан – 629 оқушы жарыстың І кезеңіне қатысуда.

Пәндік олимпиада 3 кеңенен тұрады:

І кезең – 20-30 қараша аралығында, ІІ кезең (іріктеу) – желтоқсан айында, ал ІІІ кезең (республикалық) – 2024 жылдың қаңтар айында өтеді деп жоспарланған.

Олимпиаданың басты мақсаты – қала мен ауыл мектептері арасындағы алшақтықты азайту.

Айта кетейік, жарыстың алғашқы кезеңі онлайн-платформада өтеді. Қорытынды бойынша ең жоғары ұпай жинаған қатысушылардың жалпы санының 35%-ы олимпиаданың ІІ кезеңіне қатысады. Ал ІІ кезең тапсырмалары дәстүрлі олимпиадалық түрде онлайн-платформада көрсетіліп, шешімдер қағазда жүзеге асырылады.

III кезең – республикалық деңгейде. Оған ІІ кезеңнің жеңімпаздары қатысады. Осы кезеңнің барлық қатысушылары республикалық сырттай оқу мектебіне қабылданып, ҚР ОАМ дипломдарымен және «Дарын» РҒПО грамоталарымен марапатталады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.