Ақтаулықтар Амал мерекесін тойлап жатыр

Кеше «Адай ата-Отпан тау» тарихи-мәдени кешенінде дәстүрлі «Бірлік оты» жағылды. Амал мерекесі Ақтауда да ерекше тойланып жатыр. Қаладағы барлық мекеме қызметкерлері бір-бірімен қауышып, көрісіп жатыр, деп хабарлайды mangystaumedia.kz сайты қала әкімдігінің баспасөз қызметіне сілтеме жасап.

Бүгін таңертең Ақтау қаласы әкімдігінің қызметкерлері де бір-бірін Амал мерекесімен құттықтады. Хал-жағдайларын сұрасып, көрісіп, төс қағысты. Ақтау қалалық құжаттамалық қамтамасыз ету және бақылау бөлімінің қызметкері Ермек Нұрмағанбетова барша ақтаулықтарды аталған мерекемен құттықтады.

- Амал – бағзы заманнан келе жатқан мереке. Бұл мереке халықты береке мен бірлікке, татулыққа шақырады. Барша ақтаулықтарды Амал мерекесімен құттықтаймын. Жыл құтты болсын!, - деді Ермек Нұрмағанбетова.

Амал мерекесін «Маңғыстаумұнайгаз» мекемесінің қызметкерлері де ерекше атап өтіп жатыр. Олар мерекеге орай байқау ұйымдастырған. Байқау барысында жұмыс кабинеттері ұлттық нақышта безендіріліп, ақ дастархан жайылды. Бірқатар салт-дәстүрлер мен әдет-ғұрыптар да көрсетілді. Атап айтқанда, мерекелік шарада бесікке салу, құдайы қонақ күту салты көрсетіліп, жарапазан айтылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.