Ақтауда ұстаздар марапатталды

Ақтауда мұғалімдер күніне орай «Ұстазым - үлгі-өнегем, ұлағатым» атты салтанатты шара өтті. Мерекелік шарада Ақтау қаласының әкімі Ұлықбек Тінәлиев ұстаздарды марапаттады, деп хабарлайды mangystaumedia.kz қала әкімдігінің баспасөз қызметіне сілтеме жасап.

Мәдени шараға 500-ге жуық ұстаз қатысты. Салтанатты шара барысында 100-ге жуық ұстаз марапатталды. Атап айтқанда, ұстаздар ҚР оқу-ағарту министрлігінің құрмет грамотасы мен алғысы, Маңғыстау облысы әкімінің алғысы, Маңғыстау облысы білім басқармасының құрмет грамотасы, Ақтау қаласы әкімінің құрмет грамотасы мен алғыс хатымен марапатталды. Сондай-ақ, халықаралық, республикалық және облыстық сайыстардың жеңімпазы атанған мұғалімдерге ақшалай сертификаттар табысталды. Шара барысында Ақтау қаласының әкімі сөз сөйлеп, ұстаздарды кәсіби мерекесімен құттықтады.

-Алдымен баршаңызды Маңғыстау облысының 50, қаламыздың 60 жылдығымен және мұғалімдер күнімен шын жүректен құттықтаймын. Осы жылдан бастап мұғалімдердің кәсіби мерекесі ресми түрде 5-қазан күні болып Үкімет қаулысымен бекітілді. Жалпы әлемнің 100-ден астам елінде мұғалімдер күні 5 қазанда тойланады. Биылдан бастап осы күнтізбеге Қазақстан ұстаздары да қосылып отыр. Өскелең ұрпаққа білім беріп, тәрбиелеу ісіне атсалысып, ұлы мүдде – ұлт болашағын қалыптастыруда уақытпен санаспай атқарған қажырлы еңбектеріңіз үшін сіздерге алғыс білдіремін. Жаңа заманның төрінен лайықты орын алатын жастарды тәрбиелейтін ұстаздарға әрқашан табыс тілеймін! Мерекелеріңіз құтты болсын! , деді Ақтау қаласының әкімі Ұлықбек Тналиев.

Сонымен қатар, шарада ардагер ұстаздарға да естелік сыйлықтар мен гүл шоқтары табысталды. Мәдени шара мұғалімдердің құрметіне орай арнайы ұйымдастырылған мерекелік концертпен аяқталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.