Ақтауда шұңқырлы жолдардың жөнделмеу себебін түсіндірді

Ақтауда автомобиль жолдарындағы шұңқырларды уақытша бітеу жұмыстары жүргізіліп жатыр. Ауа райы жақсарған соң бірден шұңқырды жөндеу жұмыстары басталады. Бұл туралы Ақтау қалалық жолаушылар көлігі және автомобиль жолдары бөлімі мәлімдеді, - деп хабарлайды mangystaumedia.kz сайты.

Қазіргі таңда Ақтау қаласындағы орталық автомобиль жолдарының 44 жерінде жалпы 217 шаршы метр шұңқырлы жөндеу жұмыстарын жүргізу қажет.

- Алайда ауа райының қолайсыздығына байланысты шұңқырлы жөндеу жұмыстарын жүргізу мүмкіндігі болмай отыр. Себебі шұңқырлы жөндеу жұмыстарын жүргізу үшін ауа райы тұрақты түрде, яғни бірнеше күн қатарынан +10 градустан төмен болмауы қажет. Биыл қаланың орталық автомобиль жолдарын күтіп ұстауды жүргізетін мердігер мекеме - «Компания Строй Инвест 2020» ЖШС. Аталған мердігер мекеме жасақталған келісімшарт бойынша шұңқырлы жөндеу жұмыстарын жүргізуге дайын, - дейді қалалық әкімдік.

Сонымен қатар биыл шағынауданішілік автомобиль жолдарына 50 мың шаршы метр шұңқырлы жөндеу жұмыстарын жүргізу жоспарланды. Қазіргі таңда конкурстық іс-шаралар жүріп жатыр.

Айта кетейік, былтыр Ақтау қаласында 12 500 шаршы метр шұңқырлы жөндеу жұмыстары жүргізілген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.