Ақтауда есірткімен күрес күніне орай отбасылық эстафета өтті

Ақтауда халықаралық нашақорлыққа және есірткінің заңсыз айналымына қарсы күрес күніне орай отбасылық эстафета өтті, - деп хабарлайды mangystaumedia.kz.

«Отбасым — менің тірегім» спорттық шарасы жоғары деңгейде ұйымдастырылды. Отбасылық эстафетаға қатысушылар арқан тартыс, гір тасын көтеру, қол күрес бойынша өзара бақ сынасты. Спорттық шараға 100-ден аса адам қатысты.

«Біз осымен тоқтап қалмай, алдағы уақытта да қоғамға пайдалы іс-шараларды ұйымдастырып тұрсақ деп жоспарлап отырмыз. Нашақорлықтың көбеюіне қарсы әртүрлі қоғамдық жұмыстарды атқаруға атсалысуға әзірміз», - дейді «Біз спорт үшін, есірткіге қарсымыз» қоғамдық қорының ұйымдастырушылары.

Эстафета қорытындысы бойынша -50 кг салмағы бойынша қыздар арасындағы сайыста бірінші орынды Нұрана Мурумбаева, екінші орынды Раушан Тукенеева, үшінші орынды Сұлу Мерет иеленді.

Ал 50 кг-нан жоғары салмақ бойынша қатысушы қыздар арасында Рая Мукашева бірінші орын, Бағдат Сауырбай екінші орын, Айым Жеңісбаева үшінші орын алды.

Сайыста -70 кг салмағы бойынша қатысқан ұлдардан бірінші орынды Берік Өтепбергенов, екінші орынды Мадияр Амангелді, үшінші орынды Дәулет Дағыстан жеңіп алды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.