Ақтауда есірткі тасымалдаған екі ер адам ұсталды

Ұсталғандардың бірі – Қарағанды облысының, екіншісі – Ақтау қаласының тұрғыны, деп хабарлайды mangystaumedia.kz сайты.

Маңғыстау облысы ІІД Есірткі қылмысына қарсы күрес басқармасының қызметкерлері жедел іздестіру іс-шаралары барысында Ақтау қаласындағы жалдамалы пәтерлердің бірінде 18 жастағы Қарағанды облысының тұрғынын ұстады.

Тексеру барысында 210 дана «альфа-ПВП» синтетикалық есірткі заты табылып, тәркіленді. Тәркіленген есірткі затының жалпы құны 6,5 миллион теңгеден асады.

Сондай-ақ 30 түп «гашиш» есірткісі тәркіленген.

Аталған дерек ҚР Қылмыстық кодексінің 297-бабының 3-бөлігімен СДТБТ-ға тіркелді. Сот санкциясымен күдікті 2 айға қамауға алынды.

Сондай-ақ полицейлер 23 жастағы жергілікті тұрғынды ұстады.

Тінту кезінде МДМА (экстази) синтетикалық есірткісі бар, құны 6 миллион теңгеден асатын бір үлкен полиэтилен пакет тәркіленді. Белгілі болғандай, күдікті телеграм әлеуметтік желісі арқылы есірткі сатпақ болған.

Аталған дерек ҚР Қылмыстық кодексінің 297-бабының 3-бөлігі бойынша сотқа дейінгі тергеп-тексерудің бірыңғай тізіліміне тіркелді. Сот санкциясымен күдікті 2 айға қамауға алынды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.