Ақтауда Азаматтық қоғамның рөлі туралы семинар-тренинг өтті

Бүгін Ақтауда Маңғыстау облысы ішкі саясат басқармасының жобасы аясында «Шуағыңды шаш» қоғамдық бірлестігінің ұйымдастыруымен «Сыбайлас жемқорлыққа қарсы күрес: Азаматтық қоғамның рөлі» туралы семинар -тренинг өтті, - деп хабарлайды mangystaumedia.kz.

Семинарды «24 kz» арнасының тілшісі, «Stop жемқорлық» бағдарламасының жүргізушісі Жәудір Оразхан жүргізді.

Жиынның негізгі мақсаты – сыбайлас жемқорлыққа қарсы күрес мәдениетін қалыптастыру және қоғамдық бақылау заңын жан-жақты талқылау, түсіндіру. Семинар барысында тренинг бағдарламасына шолу жасалып, мақсаты түсіндірілді. Сондай-ақ жемқорлықтың кеселі мен оның пара алу, бопсалау, алаяқтық, мүдделер қақтығысы жайлы формалары сөз етілді.

Жәудір Оразхан бұл семинар-тренинг аймақтар бойынша алғаш рет Ақтау қаласында өткізіліп отырғанын айтты.

«Ақтаудан кейін Форт-Шевченко қаласына барамыз. Басқа өңірлермен салыстырғанда Маңғыстау облысында жемқорлыққа қарсы белсенділік байқалады. Біз үшін ең тиімді әдіс – жемқорлыққа қарсы мәдениетті қалыптастыру. Сондықтан, қарапайым сыйлық бермеу, мәселені таныс арқылы шешпеу, жемқорлықпен күрес мәдениетін қалыптастыра білуіміз қажет», - деді ол.

Жәудір Оразханның сөзінше, біз ең әуелі үйіміздегі мүлкімізге қандай жанашырлықпен қарасақ, мемлекеттің мүлкіне де сондай қамқорлықпен қарауымыз қажет.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.