Ақтауда қала әкімінің кубогы үшін ардагерлер арасында ұйымдастырылған шағын футболдан халықаралық турнир өз мәресіне жетті, деп хабарлайды mangystaumedia.kz қала әкімдігінің баспасөз қызметіне сілтеме жасап.
55 жастан асқан ардагерлер арасында шағын футболдан халықаралық турнирде 100-ден астам спортшы бақ сынады. Жеті күнге созылған жарысқа барлығы 7 команда қатысты. Қаламыздың намысын төрт команда қорғады. Спорттық шараға Ақтау қаласының әкімі Ұлықбек Тналиев қатысып, қатысушыларға жылы лебізін жеткізді.
-Құрметті халықаралық турнир қатысушылары! Ақмаржан қала Ақтауға қош келдіңіздер! Биыл Маңғыстау облысына 50, Ақтау қаласына 60 жыл! Осы мерейлі мерейтойлар аясында қаламызда көптеген мәдени, спорттық іс-шаралар ұйымдастырылды. Солардың бірі - ардагерлер арасында шағын футболдан халықаралық турнир. Бұл сайыс Ақтау қаласында осымен екінші рет өткізіліп отыр. Турнирге Түркия елінен, Ақтөбе және Жаңаөзен қаласынан келген қатысушыларға, сонымен қатар Ақтау қаласының намысын қорғаған спортшыларға алғысымды білдіремін! Өскелең ұрпаққа үлгі болып, дүбірлі додаларда жеңіс тұғырынан көріне беріңіздер!, - деді қала әкімі Ұлықбек Тналиев.
Халықаралық турнирдің басты мақсаты - бауырлас елдер арасындағы ынтымақтастықты нығайту және бұқаралық спортты дамыту. Жарысқа Түркия Республикасының Ақтау қаласындағы бас консулы Сабри Альптекин де қатысты. Ақтау қаласының әкімі Ұлықбек Тналиев халықаралық турнир жеңімпаздарын марапаттады. Жарыс қорытындысы бойынша III орынға «Turkiye», ІІ орынға «Барс Ойл» командасы ие болды. Ал «Каспий» тобы турнир жеңімпазы атанды.
Бұдан бөлек барлық командаларға алғыс хат табысталып, үздік спортшылар номинация бойынша марапатталды. Атап айтқанда, Сельчук Карадаш «Үздік шабуылшы», Нұрболат Жиенбеков «Үздік қорғаушы», Сергей Суховерков «Үздік қақпашы» , Вячеслав Кузин «Үздік сұрмерген» және Таңбай Аққалиев «Үздік ардагер» номинациясына ие болды.
Сонымен қатар, қала басшысы Шоқыр Бөлтекұлын еске алуға арналған бокстан ХV халықаралық турнирге, мемлекеттік мекеме қызметкерлері арасында өткен шағын футбол жарысына және «Ана махаббаты» қоғамдық қоры ұйымдастырған «Әкем, анам және мен» атты отбасылық спорттық шараға қатысты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
