Ақтауда Әбіш Кекілбайұлының 85 жылдық мерейтойына арналған халықаралық конференция өтті

Бүгін, 27 қыркүйек күні Ақтау қаласында жазушы, мемлекет қайраткері Әбіш Кекілбайұлының 85 жылдық мерейтойына арналған халықаралық ғылыми-тәжірибелік конференция өтті, деп хабарлайды mangystaumedia.kz

Жиналған қауым алдында сөз сөйлеген Мәжіліс төрағасы Ерлан Қошанов алдымен Президент Қасым-Жомарт Тоқаевтың құттықтау хатын оқып берді.

«Әбіш Кекілбайұлы – төл мәдениетіміздің көкжиегін кеңейтіп, жаңа деңгейге көтерген заңғар жазушы, классик қаламгер. Сөз зергері ерекше дарыны мен телегей-теңіз білімінің арқасында шеберліктің шыңына шығып, теңдессіз туындылар жазды. Әбіш Кекілбайұлы – тәуелсіздігіміздің тұғырын бекемдеп, мемлекеттігімізді нығайтуға өлшеусіз үлес қосқан қайраткер. Ол жоғары лауазымды қызметтерді абыроймен атқарып, халқына қалтқысыз қызмет етті. Ұлт мүддесін және ел бірлігін қашанда бәрінен биік қойды. Әбіш Кекілбайұлының отаншылдығы, парасаттылығы, білімпаздығы мен еңбекқорлығы – өскелең ұрпаққа үлгі-өнеге. Оның танымы терең, талғамы мол мұрасы әлі талай буынға рухани азық болары сөзсіз. «Қазақ даласының әр тасы – қағбам, әр бұтасы – сәждем» деп, Отанын шексіз сүйген абыз Әбіштің есімін ел жадында сақтау – баршамыздың ортақ парызымыз», – делінген Президенттің құттықтау хатында.

Мәжіліс спикері өз сөзінде бұл мерейтой шын мәнінде халықтың мерекесі, ұлттың тойы екенін атап, Алаш абызының адами болмысын, қайраткерлік қырларын еске алды.

Ал жиынды тізгіндеген облыс әкімі Нұрдәулет Қилыбай ел тарихында баға жетпес мұра, өшпес із қалдырған жазушының өмірі мен шығармашылығына ерекше тоқталып, ауқымды шараның маңыздылығын айтып өтті.

Жазушылар одағының төрағасы Мереке Құлкеновтің сөзінше, Әбіштің шығармасында кеңдік, тереңдік және биіктік бар.

«Күй» шығармасындағы күйшінің тағдыры мына біздің кең даламыздағы адам көзі жете бермейтін кеңдікті көрсетеді. Ал «Шыңыраудағы» Еңсептің жанталасып құдық қазғысы келетіні, шыңырау қазғысы келетінінің өзі сол тереңдікке жету үшін адам өзінің өмірін сарп ететінін көрсетіп тұрған секілді. Ал енді «Аңыздың ақырында» биіктік, көз жетпейтін биіктікке Әбіш аға жеткен. Сондықтан да Әбіштің жөні бөлек. Әбіш қазақтан бөлек, орыс әдебиетінің алыптарының портретін жасаған, Әбіш жазбаған тұлға қалмаған», - деді Мереке Құлкенов.

Ал жиында сөз сөйлеген қазақтың көрнекті кино және театр қайраткері Асанәлі Әшімов «Бүгін жиналып отырған кеш заманымыздың заңғар жазушысы, ауқымы кең, сонау Мұқаңдардың жалғасы Әбіштің 85 жылдық тойына арналады. Әбекеңнің қандай адам екені шығармашылығынан-ақ, өзі жазған мақалаларынан да белгілі. Біз Әбішпен мақтанамыз!» десе, мемлекет және қоғам қайраткері Сауытбек Әбдірахманов «Таулар алыстаған сайын биіктейді деген сөз бар. Бірақ біз үшін Әбіш аға сол баяғы кездің өзінде заңғар тау болып елестейтін. Әбіш ағаның әр он жыл сайын өтетін мерейтойларына қатысыппын. Биыл да 85 жылдық мерейтойға қатысу бұйырыпты. Ол кезде қақаған қыс, қара суық. Әбіш ағамен Оңдыға барғанымызда адамдар қаумалап шығып, амандасып, қол жетпегендері алыстан жығыла жаздап жазушының сырт киіміне қол тигізіп жатты. Халықтың көңілін көріп таңғалдым. Маңғыстау елі Әбішті жас күнінен ерекше ардақтаған, аялаған, сол үшін де жұртшылыққа алғыс айтқымыз келеді» деп шараға қатысушылардың ықыласына бөленді.