Ақтауда 40-қа жуық тұрғын қаржылық сауатын арттырды

Ақтауда «Қарызсыз қоғам» жобасы аясында қаржылық сауаттылық бойынша оқыту жалғасуда. Бүгінгі семинар-тренингке 40-қа жуық қала тұрғыны қатысты, - деп хабарлайды mangystaumedia.kz сайты қала әкімдігінің баспасөз қызметіне сілтеме жасап.

Қаржылық сауаттылықты арттыруға арналған жоба 5 модульден тұрады. Бүгін спикер Асқар Имағанбетов пайдалы банк құралдарын, бизнес-жоспар жобасын жасауды және талдауды түсіндірді. Қаржылық эксперт бизнес-жоспар жасамас бұрын, жұмсалуы қажет қаражат сомасын анықтап алу керек екендігін айтты.

- Бизнес-жоспар жасамас бұрын, алдымен кәсіпті жүргізу үшін қанша қаражат керек екендігін анықтап алған жөн. Содан кейін сол қаражат сомасының FV және PV құнын білу қажет. FV - ақшаның болашақтағы құны, ал PV - болашақтағы ақшаның бүгінгі құны. Осы формула арқылы тек кәсіпті жүргізіп қана қоймай, тапқан табысты арттыруға да болады, - деді қаржылық эксперт Асқар Имағанбетов.

Шараға қатысқандардың бірі - Жамила Танатова. Ол семинарда тапқан табысты жинау және көбейту бойынша кеңестер алғандығын айтты.

- Семинарда қолда бар қаражатты қалай жұмсау, көбейту және жинау туралы нақты кеңестерді де алдым. Жоба спикеріне алғысымды айтамын, - деді Жамила Танатова.

Айта кетсек, «Қарызсыз қоғам» жобасын мемлекет басшысының тапсырмасына сәйкес «AMANAT» партиясы мен үкімет әр өңірде өткізуде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.