Ақтау битум зауытында өндіріс қарқыны төмендеді

Биыл I тоқсанда Ақтау битум зауытында өндіріс қарқыны төмендеді. Кәсіпорын шамамен 29,5 мың тонна өнім өндірді, жоспар – 100 мың тонна. ҚР Энергетика және көлік министрліктері бекіткен автожол жобаларын жол битумымен қамтамасыз ету жөніндегі биылға арналған жол картасында көзделген битумды қыс маусымында дайындау толық көлемде орындалмады, деп хабарлайды mangystaumedia.kz.

Компанияның хабарлауынша, мұның себебі – жол-құрылыс ұйымдарынан өтінімдердің болмауы, зауыттан дайын өнімді дер кезінде әкетпеуі және жол-құрылыс ұйымдары тарапынан жүк тасымалдаушыларға уақытылы ақы төлемеуі.

Зауыт өңдеу үшін пайдаланатын Қаражанбас кен орнының мұнайы жоғары сапалы жол битумын өндіруге мүмкіндік береді. Өнім сапасын бақылау бірнеше сатыны қамтиды. Біріншісі – ЭЛТҚ-АВҚ, тотығу және модификациялау цехындағы технологиялық процесті талдамалық бақылау. Екіншісі – резервуардағы битумды құжаттау. Үшіншісі – арбитражды үлгілерді таңдау және жөнелту кезінде оларды сақтау. Кәсіпорын пайдалануға берілген сәттен бері битум үлгілері «ҚаздорҒЗИ» АҚ аккредиттелген зертханасында үнемі тексеріліп отырады. Сондай-ақ 2021 жылдан бастап зауыт өнімдерін жол активтері сапасының ұлттық орталығын ай сайын бағалайды, деді компанияның баспасөз қызметі.

Былтыр ҚР Энергетика министрлігінің ведомствоаралық жұмыс тобы «CASPI BITUM» компаниясында болды. Сапар барысында сынамалар алынып, алдымен зауыт зертханасында, одан кейін Жол активтері сапасының ұлттық орталығы зертханасында талданды. Жүргізілген зерттеулер Ақтау зауытында өндірілетін битум қазақстандық стандартқа толық сәйкес келетінін көрсетті.

Айта кетейік, Ақтау битум зауыты өнімді уақтылы жөнелте отырып, жыл бойына ең жоғары өнімділікпен жұмыс істеуге дайын. Ол үшін кәсіпорында барлық жағдай жасалған. Зауыттың қуаты жылына 500 мың тонна битум (айына 50 мың) болғанымен, ол 110% өнімділігімен жылына 550 мың тоннаға дейін битум өндіруге қауқарлы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.