Аққуды азықтандыру: Ғалымдар не дейді?

Қаракөл көліндегі аққуларды қолдан тамақтандыру - дұрыс емес. Бұл туралы аймақтағы Орман шаруашылығы және жануарлар дүниесі комитеті ғалымдардың пікіріне сүйеніп, жауап берді, - деп хабарлайды mangystaumedia.kz сайты.

Бұған дейін белсенді желі қолданушысы Азамат Сәрсенбаев аққуларға азық беруді және сол арқылы құстарды аман алып қалуды ұсынған еді.

Ал Қазақстанның орнитологы, биология ғылымдарының кандидаты Виктория Анатольевна Ковшарь және 16 жылдан астам уақыттан бері Қаракөл көліндегі құстарды қыста зерттеп жүрген Қазақстан табиғатты қорғау қауымдастығының ғылыми директоры, биология ғылымдарының кандидаты Скляренко Сергей Львовичтың айтуынша, аққу – көлді уақытша паналап, кейін басқа жаққа қоныс аударатын құс. Сондықтан аққудың құс тұмауын жұқтыруы азықтың жетіспеушілігінен емес.

- Ақтау қаласының жағалауында аққуларды нанмен тамақтандырады. Себебі нан ылғалданып, судың бетінде қалады және бұл тағамды аққулар алады. Бірақ бұлай жаппай жиі тамақтандыруға болмайды. Мұны қала тұрғындары, ең бастысы балалар ескеруі тиіс. Ал таяз, жылы, жабық Қаракөл су қоймасында қосымша органикалық заттарды енгізу бүкіл кешен үшін өте қауіпті. Сонымен қатар аққулар құрғақ дәнмен ғана емес, су астындағы өсімдіктермен қоректенеді. Азық-түліктері таусылғаннан кейін жай ғана басқа жаққа ұшып кетеді, - дейді ғалымдар.

Қаңтар айының екінші онкүндігінде орнитолог Виктория Анатольевна Ковшарь Қаракөл көліне барады. Ғылыми зерттеулер жүргізіп, қыстайтын құстарды санау жоспарланып отыр.

Еске салайық, былтыр 21 желтоқсанан бастап 2024 жылдың 5 қаңтарына дейін 508 құстың өлексесі табылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.