Жоғары білімі бар кадрларды даярлауға 175 білім беру гранты бөлінді

Бұл туралы Қоғамдық коммуникация орталығында өткен брифингте Маңғыстау облысы білім басқармасының мектепке дейінгі және жалпы білім беру бөлімінің басшысы Клара Құлатаева айтты, - деп хабарлайды mangystaumedia.kz сайты.

2022-2023 оқу жылына 150 грант денсаулық сақтау саласына, 15 грант ауыл шаруашылығы және биоресурсатр саласына және 10 грант өнер саласына бөлінген.

- Жалпы бұл грант ҚР Үкіметінің 2008 жылғы 23 қаңтардағы №58 Қаулысы негізінде 2018 жылдан бері жергілікті бюджет есебінен жүзеге асып келеді. Осы уақытқа дейін 700 білім беру гранты бөлінді, - деді Клара Құлатаева.

Конкурсқа қатысу үшін Қазақстанның 18 жоғары оқу орнынан өтінім келіп түскен, комиссия ұйғарымымен 16 ЖОО-на мемлекеттік тапсырыс беріледі деп шешілді. Оның ішінде, жалпы медицина бойынша - 8, ауыл шаруашылығы бойынша – 4, өнер бойынша - 4 университет тапсырысты жеңіп алған.

Талапкерлерден құжат қабылдау уақыты 8-12 тамыз аралығында онлайн түрде жүргізіледі. Талапкерлер құжаттарын bilimbaskarmasy2022@mail.ru электронды мекенжайына жолдау керек.

Айта кетейік, қабылдау басталғалы 100-ден астам өтініш «Жалпы медицина» мамандығына, төртеуі өнер мамандықтарына және бір өтініш ауыл шаруашылығына келіп түскен. Соның ішінде талапқа сай болмаған және құжаттың жетіспеуіне байланысты 9 құжат кері қайтарылған.

Тапсыруға міндетті құжаттар тізбесі:

1) белгіленген үлгідегі бланкіде өтініш (Өтініш үлгісі Білім басқармасының www.mangystau.gov.kz ресми сайтында жарияланды);

2) жалпы орта білімі туралы құжат көшірмесі (құжаттарды жоғары оқу орнының қабылдау комиссиясына тапсырған кезде төлнұсқа тапсыру);

3) ҰБТ сертификатының көшірмесі, студенттер үшін соңғы сессия қорытындысы, интернатураға тапсыратындарға «бакалавр» бітіргендігі жөнінде диплом көшірмесі (құжаттарды жоғары оқу орнының қабылдау комиссиясына тапсырған кезде төлнұсқа көрсету);

4) 086-У нысаны бойынша медициналық анықтама көшірмесі (құжаттарды жоғары оқу орнының қабылдау комиссиясына тапсырған кезде төлнұсқа тапсыру);

5) жеке басын куәландыратын құжаттың көшірмесі;

6) Көп балалы, аз қамтылған отбасы, жетім және ата-ана қамқорлығынсыз қалған балалар екендігін дәлелдейтін құжаттар көшірмесі(болған жағдайда);

7) «Жалпы медицина» мамандығына тапсырушыларға психометриялық емтихан анықтамасы;

8) «Өнер» мамандықтарына шығармашылық емтихан нәтижесі

Талапкерлердің құжатын қарау үшін конкурс комиссиясының отырысы 17-18 тамыз күндері өткізіледі. Грант иегерлерінің тізімі облыс әкімдігінің, білім басқармасының сайттарында 20 тамызға дейін жарияланады. Ал білім беру гранты туралы куәлік 25 тамызда беріледі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.