Полицейлер арасында ауылдық спартакиада өтті

Қазақстан полициясының 30 жылдығына орай Шетпе ауылында Маңғыстау облысы Полиция департаментінің аудандық полиция бөліністерінің қызметкерлері арасында ауылдық спартакиада ұйымдастырылды, деп хабарлайды mangystaumedia.kz Полиция департаментіне сілтеме жасап.

Бұл спартакиадада 5 командадан тұратын 60 қызметкер бақ сынады.

Спорттық шара жауынгерлік қарудан оқ ату, гір тасын көтеру, гимнастика, жүгіруден эстафета және шағын-футбол секілді кезеңдерден тұрды. Жауынгерлік қарудан оқ ату ашық аспан астында атуға арналған арнайы орында өткізілді.

Жеке біріншілікте атудан жүлделі бірінші орынды Түпқараған ауданы Пб қызметкері Кенжеғали Габдулов иеленсе, гір тасын көтеруден бірінші орынды Бейнеу ауданының намысын қорғаған Саламат Кабажанов қанжығасына байлады. Турникке тартылу гимнастикасы бойынша аса қайсарлықпен көзге түсіп, ұпай санымен өзгелерден оқ бойы ілгеріленген Қарақия ауданы Пб қызметкері Өмірзақ Чиндақұл болды.

Командалық біріншілікте жүгіруден эстафетада Маңғыстау ауданы Полиция бөлімінің жүйрік қызметкерлері топты жарып, бірінші орынды иеленді. Ал, шағын-футбол ойынында жеңіске жеткен Қарақия ауданы Пб болды.

Жалпы, ауылдық спартакиадада командалық біріншілікте жүлделі бірінші орынды - Қарақия ауданы, екінші орынды - Маңғыстау ауданы, үшінші орынды - Бейнеу ауданы полиция бөліністері иеленді.

Марапаттау рәсімінде Департамент бастығының орынбасары Қандарбек Бахтыгереев сөз сөйлеп, барша жеңімпаздарды жеңістерімен құттықтады. Ол өз сөзінде, мұндай ауылдық сипаттағы спартакиаданың жыл сайын жалғасы табылатындығын атап өтті. Жеңімпаз қызметкерлер мен командаларға грамоталар мен медальдар, кубоктар табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.