Қазақстан шекарасынан заңсыз өткен екі шетел азаматына сот шешімі шықты

Былтыр қазанда Қазақстан Республикасының Мемлекеттік шекарасын қасақана заңсыз кесіп өткені үшін ұсталған екі шетел азаматқа сот шешімі шықты. Ұсталғандардың бірі 5 жыл мерзімге ҚР шегінен шығарумен 6 айға бас бостандығынан айырылса, енді бірі 17 жылға бас бостандығынан айырылды, - деп хабарлайды mangystaumedia.kz сайты ҚР ҰҚК баспасөз қызметіне сілтеме жасап.

2021 жылғы желтоқсанда ұсталғандардың бірі 392-баптың 1-бөлігі (Қазақстан Республикасының Мемлекеттік шекарасын қасақана заңсыз кесіп өту) бойынша кінәлі деп танылып, 5 жыл мерзімге ҚР шегінен шығарумен 6 айға бас бостандығынан айырылды.

2022 жылғы 10 наурызда Мамандандырылған ауданаралық сот екінші шетелдік азаматты Қылмыстық кодекстің 286-бабы 4-бөлігі (айналыстан алып қойған заттардың немесе айналысы шектелген заттардың контрабандасы), 297-бабы 3-бөлігі 1, 3-тармақтары (есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) және 392-бабы 1-бөлігі (Қазақстан Республикасының Мемлекеттік шекарасын қасақана заңсыз кесіп өту) бойынша кінәлі деп таныды. Ол жазасын қылмыстық-атқару жүйесінің қауіпсіздігі барынша жоғары мекемесінде өтеумен 17 жылға бас бостандығынан айырылды.

Еске сала кетейік, былтыр қазанда Шекара қызметі мен ҰҚК Маңғыстау облысы бойынша департаменті Каспий теңізі су айлағындағы бірлескен іс-шаралар барысында Қазақстан Республикасының Мемлекеттік шекарасын қасақана заңсыз кесіп өткені үшін екі шетел азаматы бар «Амур» типті шағын кемені ұстады.

Жүзу құралын тексеру барысында салмағы 14 кг «апиын», 8 кг «гашиш» және «метадон» психотроптық затының 29 пластинасы табылып, тәркіленді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.