Бейнеу ауылында ұзындығы 14,2 шақырым жол жөнделеді

Бейнеу ауылындағы 14,2 шақырым жолға орташа жөндеу жұмыстарын жасау жоспарланып отыр. Бұл туралы Маңғыстау облысының қоғамдық коммуникация орталығында өткен брифингте Бейнеу ауданының әкімі Бейнеубек Әбілов мәлімдеді, - деп хабарлайды mangystaumedia.kz сайты.

Бұл жоба қаржылай қолдау тапқан жағдайда ғана орындалады. Осы мақсатта ЖСҚ дайындалып, бюджетке өтінім берілген. Жоба құны - 269 млн теңге.

Жалпы, аудан бойынша 490,7 шақырым автокөлік жолы бар. Оның ішінде 178 шақырым аудандық маңыздағы, 312,7 шақырым ауылішілік жолдар.

Аудандық маңыздағы автокөлік жолдардың 36,5% қатқыл табанды, жергілікті маңыздағы автокөлік жолдардың 35,8% қатқыл табанды.

2021 жылы Төлеп ауылына ұзындығы 4,3 шақырымды құрайтын автокөлік жолының құрылысы толықтай аяқталды. Жобаның құны - 86,5 млн.теңге.

Сонымен қатар, ұзындығы 2,6 шақырымды құрайтын Ақжігіт ауылы (ауылішілік) №2 құрам бөлігіне автожол құрылысы жүргізілуде. Мердігер мекеме «Промстроймонтаж-ХХІ» ЖШС. Келісім шарт құны – 104,5 млн.теңге. Қазіргі таңда – 45,3 млн.теңге қаржы игерілді. Жобаны 2022 жылы толық аяқтау жоспарланып отыр.

Ұзындығы 73 шақырымды құрайтын «Сыңғырлау – Сам – Ноғайты – Тұрыш» аудандық маңыздағы автокөлік жолы болып табылады. Бұл жолды күтіп ұстау мақсатында 2021 жылы құны – 27,5 млн. теңгеге жөндеу жұмыстары жүргізілді. Биылғы жылы аталған жолды жөндеуге қосымша қаржы қарастырылуда. Сондай-ақ, Боранқұл ауылындағы 2 шақырым жолға орташа жөндеу жұмыстарын жүргізуге ЖСҚ дайындалып, бюджетке өтінім берілді. Жоба құны – 81 млн.теңге, - деді аудан әкімі Бейнеубек Әбілов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.