Светқали Нұржан «30 жыл 30 есім» байқауында жеңімпаз атанды

Qazaqstan Ұлттық Телеарнасы ұйымдастырған «30 жыл 30 есім» ұлттық байқауының жеңімпаздары анықталды. «Әдебиет» аталымы бойынша маңғыстаулық Светқали Нұржан марапатталды, - деп хабарлайды mangystaumedia.kz сайты.

Марапатты ҚР Мәдениет және спорт министрі Ақтоты Райымқұлова табыстады. Сонымен қатар «Әдебиет» аталымы бойынша Дулат Исабеков пен Ұлықбек Есдәулет те жеңімпаз атанды.

«Бұрынғы қазақ дәстүрінде аламан бәйгеге ат сонау 80-90 шақырымнан айналады. Сол кезде ат қарақшыға жақындағанда, әр төбенің басында тілекші жұрт топ-топ болып, жиналып, атты тартады. Сөйтіп күштілер аттарын қарақшыдан оздырады. Сол сияқты бізді де шылбырымыздан тартып, сүйреп, оздырып жатыр. Осы ретте барша тілекші жанға, оқырман мен жанашыр бауырға, замандасқа мың сан алғыс айтамын. Әрине, Тәуелсіздіктен құнды, Тәуелсіздіктен қадірлі, аяулы еш нәрсе жоқ. Мереке құтты болсын!», - деді Светқали Нұржан марапаттау сәтінде.

Айта кетейік, ұлттық байқауда 10 салада табысты еңбек етіп келе жатқан кәсіби мамандар арасынан үздіктер тандалды. Яғни www.qazaqstan.tv ресми сайтында жүргізілген жалпыхалықтық дауыс беру арқылы жеңіпмаз есімі белгілі болды. Бір аптаның ішінде дауыс беруге 962 858 қазақстандық қатысты.

10 аталым бойынша жеңімпаздар:

«Медицина және денсаулық сақтау саласына қосқан үлесі үшін» - Серік Ақшолақов, Юрий Пя, Надежда Петухова;

«Қоғамдық белсенділігі үшін» Асылы Осман, Олеся Баимова, Айман Омарова;

«Мәдениет саласына сіңірген еңбегі үшін» Димаш Құдайберген, Секен Тұрысбеков, Ерболат Төлепбай;

«Кино саласына сіңірген еңбегі үшін» Болат Әбділманов, Асанәлі Әшімов, Досхан Жолжақсынов;

«Спорт саласындағы жетістіктері үшін» Дәулет Тұрлыханов, Қанат Ислам, Илья Ильин;

«Ғылымның дамуына қосқан үлесі үшін» Асқар Жұмаділдаев, Күнсұлу Закарья, Зейнолла Самашев;

«Білім саласының дамуына қосқан үлесі үшін» Муаммер Гүл, Аятжан Ахметжанұлы, Аягүл Миразова;

«Ауыл шаруашылығы және агроөндіріс саласына қосқан үлесі үшін» Нұрислам Ыбраев, Иван Сауэр, Сыдық Дәулетов;

«Дәстүрлі өнердің дамуына қосқан үлесі үшін» Айгүл Үлкенбаева, Рамазан Стамғазиев, Елмұра Жаңабергенова;

«Әдебиет» аталымы бойынша Дулат Исабеков, Светқали Нұржан, Ұлықбек Есдәулет.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.