Ақтауда 21 млн теңге жүлдесі бар өнер фестивалі аяқталды

Ақтауда облыстық «Маңғыстау жұлдыздары» өнер фестивалі өз мәресіне жетті. Байқаудың бас жүлдесі 6 млн теңгені Маңғыстау ауданының өнерпаздар ұжымы иеленді,- деп хабарлайды mangystaumedia.kz сайты.

Ал арнайы жүлде 1 млн теңгені Ақтау қаласының өнерпаздары алса, қалған қала мен аудандарға 800 мың теңгеден табысталды. Сонымен қатар 100-ден астам жеке өнерпаз бен 43 шығармашылық ұжым дипломдармен, қаржылай сыйлықтармен марапатталады. Бұл қаржылай сыйлықтар аудан, қалалардағы мәдениет ошақтарының материалдық-техникалық базасын нығайтуға жұмсалады.

Биыл фестиваль он екінші рет ұйымдастырылды. Негізгі мақсаты – тасада қалған таланттарды тауып, олардың жұлдызын жағу.

Бірінші қараша күні басталған фестивальға қала, аудандардан екі мыңға жуық көркемөнерпаз қатысты. Олар халық аспаптарда орындау, халық аспаптар оркестрі, домбырашылар ансамблі, дәстүрлі ән, жыр, көркемсөз оқу, хореграфия жанры, классикалық музыка сынды 12 аталым бойынша бақ сынады.

Елде баламасы жоқ фестивальдың ерекшелігі – байқауға кәсіби мамандар емес, қарапайым тұрғындар өнер көрсетті. Мерекелік кеште сөз алған облыс әкімі Нұрлан Ноғаев шараның маңыздылығына тоқталып, бұл фестивальдің мәдениеттің ғана емес, күллі елдің руханиятына қосылған зор үлес екенін атап өтті.

«Елбасының бастамасымен Тәуелсіздік жылдары рухани құндылықтарымызды қайта жаңғырттық. «Рухани жаңғыру», «Ұлы даланың жеті қыры» бағдарламалары рухани өмірімізге жаңа серпін берді. Президент те өз жолдауларында елдің рухани дамуы мен кемелденуі мәдениеттің қарқынды дамуымен ұштасып жатқанын айтып, айрықша баға берген болатын. Демек, «Маңғыстау жұлдыздары» секілді іргелі, жүйелі жүретін фестивальдер елдің дамуына серпін беретін тетік», - деді облыс әкімі.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.