Түркия Республикасы бес жылдан бері 15 шілде күнін демократия және ұлттық бірлік күні ретінде атап өтіп келеді. Бұл күні лаңкестік топқа бір кісідей қарсы шыққан түрік халқы өзінің бірлігін көрсеткен еді. Осыған орай Түркия Республикасының Ақтау қаласындағы Бас консулдығында арнайы шара өтті.
Қызыл аймақтағы өңіріміздің эпидемиологиялық жағдайына байланысты консулдық ауласында ұйымдастырылған басқосуды кіріспе сөзбен ашқан Түркия Республикасының Ақтау қаласындағы Бас консулы Мұзаффер Ақйылдырым лаңкестік әрекет барысында көз жұмған шейіттерді еске алу үшін 1 минут үнсіздік жариялады.
- Бүкіл тарихы жеңістерге толы Түркия Республикасы әлемде гуманитарлық көмек беруші қуатты ел, - деді ол.
- 251 азаматымызды өлтіріп, 100 жылдық демократиямызды қырғынға ұшыратқысы келген, екі мыңнан астам азаматымызды жарақаттаған опасыз ФЕТӨ-ның 2016 жылғы 15 шілдедегі төңкеріс әрекетінен бері, міне, 5 жыл өтіп отыр. Фетуллах Гүлен бастаған фетуллахшы лаңкестік ұйымының төңкеріс әрекеті—қанды лаңкестік акты. Бұрын-соңды болмаған тәсілмен төңкеріс жасаушылар ұлттық егемендігіміздің өкілі—Түркия Ұлы Ұлттық Мәжілісін бомбалап, ресми мекемелерге шабуыл жасап, бейкүнә бейбіт тұрғындарға аяусыз оқ жаудырды. Бұл әрекет кезінде қырағылық танытқан түрік халқы мен ресми мекемелер кедергі жасады, төңкеріс ұйымдастырғандар заң негізінде жауапқа тартылды және ФЕТӨ лаңкестік ұйымының мемлекеттік мекемелер ішіндегі ұйымдық құрылымы әшкереленіп, ФЕТӨ «параллель мемлекеттік құрылым» негізі жойылды. ФЕТӨ-ның тек Түркияға ғана емес, көптеген елдердің демократиясына қауіп төндіретінін ұмытпаған жөн. Ал бұл қулық-сұмдық ұйымы сыртынан қарағанда білім және қайырымдылық ұйымы сияқты болғанымен шын мәнінде олай емес. Түркия Республикасы Ұлттық және Халықаралық лаңкестікке қарсы күресінде және халықаралық құқықтар мен мүдделерінің қорғалуында «Алдымен Отан» және «Түркия басып өтілмейді» қағидаларымен өзінің даңқты тарихынан алған күшімен 2023-2071 жылдардағы мақсаттарына табындылықпен жетеді. Демократия және ұлттық бірлік күніне орай, Түркия халқына аманат етілген ардагеріміз Мұстафа Кемал Ататүрік және оның батыр замандас бауырлары, сонымен қатар бүгінгі ұлттық еріктің мызғымастығын әлемге паш еткен, жанын пида қылған бүкіл отандастарымыз бен ардагерлерімізді құрметпен және ризашылықпен еске аламыз.
Жиын барысында «Маңғыстау-Медиа» ЖШС директоры Айсұлу Дутбаева және көршілес елдер консулдықтарының өкілдері сөз сөйлеп, тілектерін жеткізді.
Жиналған қонақтар лаңкестік әрекет болған күнгі жантүршігерлік жағдайды баяндайтын фотокөрмені тамашалап, оқиғаның мән-жайымен тереңірек танысты.
Валентина ҚОЗЫБАҚОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
