Бүгін облыс әкімі С.Трұмов «Назарбаев Зияткерлік мектептері» Дербес білім беру ұйымдары басқарма төрайымы Күләш Шәмшидинованы, Bilim Media Group электрондық білім беру компаниясының бас директоры Рауан Кенжеханұлын қабылдады, деп хабарлады mangystaumedia.kz.
Кездесуде Күләш Ноғатайқызы облыстағы орта білім беру ұйымдарында Назарбаев Зияткерлік мектептерінің озық тәжірибесін пайдалану арқылы білім сапасын көтеруге, мұғалімдердің біліктілігін арттыруға қатысты бірқатар ұсыныстарын жеткізді.
"Маңғыстау облысының білім жүйесіне мән беріп отырғаны қуантады. Назарбаев Зияткерлік мектебі аймақтағы жалпы білім беретін орта мектептердің білім сапасын көтеруге жан-жақты қолдау көрсетуге дайын. Маңғыстау интернет жылдамдығы бойынша алдыңғы қатардағы аймақ. Бізде 1-11 сынып аралығында білім беретін тегін сайттарымыз бар. Мұғалімдерге арналған біліктілік курсын тегін өткізуге, жаңа методикалық құралдырды пайдалану дағдысын үйретуге дайынбыз" - деді Күләш Шәмшидинова.
Аймақ басшысы балалардың сапалы білім мен саналы тәрбие алу үшін бірлесіп жұмыс жасауға қолдау көрсетуге әзір екенін жеткізді.
Айта кетсек, бүгін Маңғыстау облысы әкімінің орынбасары Г. Қалмұратованың төрағалығымен Тәуелсіздіктің 30 жылдығы аясында «Достық» үйінің ғимаратында «Назарбаев Зияткерлік мектептері» ДББҰ Басқарма Төрайымы К. Шәмшидинова, қалалар мен аудандардың әкімдерінің орынбасарлары, Bilim Media Group электрондық білім беру компаниясының бас директоры Р. Кенжеханұлы, облыстық маслихат депутаттары, білім беру ұйымдарының басшылары мен педагогтардың қатысуымен Маңғыстау облысының орта білім беру ұйымдарының басшыларына арналған форум өтті.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
