11 қаңтар 2021 жылы сағат 08.15 шамасында, азамат М. «Lada 21902» маркалы автокөлігін басқара отырып, Ақтау қаласы 31А шағын ауданында орналасқан «Дана» сауда орталығына қарама-қарсы тас жолда, Қазақстан Республикасы Жол Қозғалысы Ережесінің 1.5 тармағында көрсетілген «Жол қозғалысына қатысушылар жол жүрісі үшін қауіп туғызбайтын және зиян келтірмейтіндей етіп іс-қимыл жасауы тиіс» және 14.1 тармағында көрсетілген, яғни «Жүргізуші өзінің жүру бағытындағы жолдың жүру бөлігін реттелмейтін жаяу жүргіншілер өткелі бойымен өтіп келе жатқан жаяу жүргіншілерге жол беруге міндетті»,- деген талаптарын өрескел бұзып, реттелмеген жаяу жүргіншілер өтпесінен өтіп бара жатырған 1997 жылы туған А.-ны қағып, жол- көлік оқиғасын жасаған.
Сот талқылауы барысында, сот, тараптарды тыңдап, іс құжаттарын салыстырмалы зерттеп, тұжырымға келіп, 17 наурыз 2021 жылғы үкімімен М. Қазақстан Республикасы ҚК-нің 345-бабының 2-бөлігімен кінәлі деп танылып, оны 2 жылға көлік құралын жүргізу құқығынан айырып, оған 1 жылға бас бостандығын шектеу жазасы тағайындалған.
ҚР-сы ҚК-нің 44-бабының 2-бөлігіне сай, сотталған М. тағайындалған мерзімге пробациялық бақылау белгіленіп, мінез-құлқын бақылау үшін міндеттер жүктелген.
Одан басқа, ҚР-сы ҚК-нің 44-бабының 1-бөлігіне сай, бас бостандығын шектеу жазасы тағайындалған М.-тың тұрақты жұмыс орны болмағандығын ескеріп, жергілікті атқарушы органдармен айқындайтын орындарда жазаны өтеудің бүкіл мерзімі ішінде жыл сайын 100 сағатқа мәжбүрлі еңбекке тартылған.
Жүктелген міндеттерді тиісінше орындамаған жағдайда ҚР-сы ҚК-нің 44-бабының 3-бөлігіне сай, тағайындалған жаза бас бостандығынан айыру түріндегі жаза түріне ауыстыру тәртібі түсіндірілген.
Сотталушы М.-тан жәбірленушілердің өтемақы қорының пайдасына ҚР-сы ҚК-нің 98-1,98-2-баптарына сай, соңғыдан он айлық есептік көрсеткіш мөлшерінде, яғни 29170 теңге өндірілген.
Қылмыстық іс бойынша азаматтық талап берілмеген жағдайда жәбірленушіге және оның өкіліне азаматтық іс өндірісінде беру құқығы мен тәртібі түсіндірілген.
Ақтау қалалық сотының судьясы Байтұрова Гюлнар Төрембайқызы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
