Каспий теңізі жағалауында рейдтік шаралар жүргізу қолға алынды

Бұл туралы Маңғыстау облысы экология департаментінің баспасөз қызметі хабарлады.

Бүгіннен бастап Каспий теңізі жағалауында рейдтік шаралар жүргізу қолға алынды. Оған Маңғыстау облысы экология департаменті, облыстық табиғи ресурстар және табиғат пайдалануды реттеу басқармасы, эко-амбассадор, Ақтау қаласының әкімдігі, қоғам белсенділері, "Ecojer" қауымдастығының аймақтық филиалы және БАҚ өкілдері қатысты. Теңіз жағасында демалушыларға жаднамалар таратылып, қоршаған ортаны қорғау бойынша түсіндіру жұмыстары жүргізілді.

Маңғыстау облысы бойынша экология департаменті басшысының орынбасары Нұрлан Садықов, «Әкімшілік құқық бұзушылық туралы» ҚР Кодексінің 697 бабы бойынша заңды тұлғаларды әкімшілік жазаға тарту қарастырылғанын атап өтті. Сонымен қатар ішкі істер органдары қоғамдық орындарда тәртіпке бағынбай қоршаған ортаға экологиялық зиян келтіргені үшін жеке тұлғаларды ҚР Әкімшілік кодексінің 685 бабы негізінде әкімшілік жауапкершілікке тарту жазасы қарастырылғаны айтылды.

«Қазақстан Республикасының Президенті Қасым-Жомарт Тоқаев адамдардың қоршаған ортаға деген қарым-қатынасына алаңдаушылық білдірді. Алаңдаушылыққа Ақмола облысында орналасқан Көбейтұз көліндегі табиғи қызғылт тұздың варвар әдісімен жинаушылары, сондай-ақ Каспий теңізі жағасындағы итбалықты қатігездікпен тастармен ұрған адамдардың әрекеті себеп болды. Яғни, бұл фактілер адамдардың табиғатқа деген мәдениетсіздігі мен білімінің төмендігінен орын алып отыр. Бұл ретте Президент барлық мүдделі мемлекеттік органдарға азаматтардың экология саласындағы білім деңгейін арттыру бойынша өз құзыреті шегінде тиісті шаралар қабылдауды тапсырды», - деді ол.

Эко-амбассадор Әділбек Қозыбақов өткен аптада жалғыз адамдық сенбілік акциясын бастап берді. Осындай шараларды ұйымдастыру арқылы халықтың белгілі бөлігінің назарын аударуға болатынына сенімді. Дегенмен, бұл да жеткіліксіз болуы мүмкін. Оның айтуынша, мәселені шешу жолдарын, тәрбиелік аспектімен бірге айыппұл санкцияларын қолдана отырып, кешенді және жүйелі түрде қарастыру керек. Бұл экологиялық инспекторлар, табиғатты қорғау полиция қызметкерлері және жағалау шағын аудандарының учаскелік инспекторлары үшін өз жұмыстарының көрсеткіштерін көтеретін жақсы себеп болар еді. Қоғамдық инспекторлар ретіндегі қала белсенділері, журналистер және блогерлер бірлесіп, арнайы рейдтер жүргізсе де артық етпейді.

«Менің ойымша эстетикалық, экологиялық және практикалық тұрғыдан қолайсыз болып келетін Ақтаудың жағалау аймағындағы пластик пальмалары өз алдына жеке тақырып. Эстетика жағын қарастыратын болсақ, олардың барлығы бірдей мөлшерде және бір бірінен бірдей қашықтықта орналасқан, сондықтан табиғи еместігі көзге түсіп, бір қарағанда әдемі көрінбейді. Экологиялық қолайсыздығы, біріншіден, пластик ауа райы қатты ыстық кезде белгілі мөлшерде балқып, улы заттармен ауаны бүлдіреді. Екіншіден, пластик бұтақтар желмен ұшып, соңында теңізге түсіп, Каспийдің экожүйесін ластайды. Адамдар үшін көлеңке бермеуі – практикалық пайдасының жоқтығын көрсетеді. Ал егер шеттен келген экологиялық емес жасанды ағаштардың орнына жергілікті флора отырылғызылатын болса, мысалы, жыңғыл, жүзгін, сексеуіл немесе қарағаш, немесе Маңғышлақ эксперименталды ботаникалық бақта интродукциядан өткен жапон софорасы, биік айлант және т. б., әдемілік те, экологиялылық та, практикалылық та көрініп, әртүрлі жәндіктер мен құстардың мекендеу ортасына айналар еді», - дейді маңғыстаулық эко-амбассадор.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.