Маңғыстауда COVID-19-пен күресу үшін иммундық плазманың алғашқы доноры тіркелді, деп хабарлайды облыстық денсаулық сақтау басқармасының баспасөз қызметі.
Қандай да бір инфекцияларды бастан кешірген пациенттерді плазмамен емдеу әдістемесі бұрыннан белгілі және тиімді. Қазақстандықтардың арасында белгілі бір ауруға шалдығып, сол ауруды жеңгендердің плазма құюына мүмкіндік беріліп отыр.
Осы ретте Маңғыстау облысының қан орталығы донорларды қабылдауға дайын.
«Коронавирусты жеңген және иммундық плазмамен бөлісуге шешім қабылдағандар үшін орталық пен кабинеттерге жеке кіру мүмкіндігі қарастырылған. Басқа донорлармен олар кездеспейді. Әлеуетті донор COVID-19 антиденелерінің бар-жоғына алдын ала талдау тапсырады, олардың бар-жоғы расталғаннан кейін донорды плазмаферез рәсіміне шақырады. Процедура стандартты, қалыпты плазмадан айырмашылығы жоқ. Бірінші кезекте донор сауалнама толтырып, базаға тіркеліп, алғашқы зертханалық тест тапсыруы керек. Бұл – гемоглобин, қан тобы, резус-фактор және АЛТ бауыр көрсеткіштері. Барлық сұрақтар бойынша донорға жан-жақты түсіндіріледі. Әсіресе, адамның бойын, салмағын, қан қысымын, температурасын өлшейді, әрі қарай құпия әңгіме жүргізіледі», - делінген хабарламада.
Иммундық плазма донорларына қойылатын талаптар стандартты. COVID-19 індетінен жазылып стационардан шыққаннан кейін, кем дегенде екі апта үй карантинінде болуы тиіс. Бір донордан 2-3 дозаны алынады. Иммундық плазманы әр түрлі пайдалануға болады, бірақ міндетті түрде медициналық талаптар сақталуы тиіс. Плазманы үш жыл бойы мұздатуға және сақтауға болады. Алайда бұл дәрі-дәрмектерге балама емес.
Айта кету керек, иммундық плазма әдісі, яғни емделушілерге сауықтырылған қан плазмасын құю алғаш рет Қытайда қолданылған болатын. Ақпан айынан бастап қытайлық медицина қызметкерлерінің зерттеу нәтижелері бойынша, емделушілердің сауығуы кезінде жиналған плазмада коронавирустың дамуын бейтараптандыруға қабілетті антиденелер болған. Сәуір айынан бастап бұл процедура Ресейде қолданылды, ал 15 сәуірде бұл емдеу әдісі Қазақстанда ресми түрде клиникалық хаттамаға енгізілді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
