"Патриот бол": Сұраққа жауап беріп, таксимен тегін қатына

Маңғыстауда мемлекеттік рәміздерді, ел тарихы мен тұлғалардың өмірін насихаттауға бағытталған «Патриот бол» таксиі іске қосылады. Жоба 1 маусымнан бастап 30 қарашаға дейін жалғасады, - деп хабарлайды mangystaumedia.kz сайты.

Жобаның мақсаты - жастарға мемлекеттік рәміздерді насихаттау арқылы патриотизмді қалыптастыру. Сондай-ақ азаматтардың бойындағы ұлтжандылық қасиетін ояту, Отанға деген сүйіспеншілігі мен адалдығын арттыру. Жоба Маңғыстау облысының аумағындағы 6-35 жас аралығындағы азаматтарға арналған.

- Жобаның басты ерекшелігі - «Патриот такси». Такси қала, аудан көшелерін аралап, жолаушыларды діттеген жеріне тегін жеткізеді. "Патриот" таксиіне отырған әрбір жолаушы 3 кезеңнен тұратын интелектуалдық ойынға қатысады. Такси жүргізушісі қойған сұрақтарға мүдірмей жауап берген жолаушы арнайы сыйлықтарға ие болады. Сондай-ақ «Біле жүріңіз!» айдарында такси жолаушыларына мемлекеттік рәміздердің мағынасы, тәуелсіз ел болуға үлес қосқан ұлы тұлғалардың азаматтық еңбегі мен қызмет жолы туралы мағұламаттар айтылады, - дейді жоба жетекшісі Әлия Исаева.

Бұдан бөлек Ақтау көшелеріне 60 мемлекеттік ту ілінеді, 2 қоғамдық автобус брендтеледі. Сонымен қатар мемлекеттік рәміздер күнінің мәртебесін көтеруге бағытталған ашық аспандағы қоғамдық-тарихи іс-шара ұйымдастырылады.

Жобаны «JASART» жеке меншік мекемесі Маңғыстау облысының Ішкі саясат басқармасының тапсырысы негізінде орындайды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.