Төл теңгеге – 30 жыл

Бүгін, 15 қарашада ұлттық валютаға 30 жыл толды. Ұлттық валюта күні елдегі қаржы саласы қызметкерлерінің төл мерекесімен тұспа-тұс тойлануда, деп хабарлайды mangystaumedia.kz сайты zakon.kz сайтына сілтеме жасап.

1993 жылы 12 қарашада Қазақстан Республикасы президентінің "Қазақстан Республикасының ұлттық валютасын енгізу туралы" Жарлығы шықты. Бұл мемлекетке толыққанды банк секторын қалыптастыруды бастауға да мүмкіндік берді.

1993 жылы 15 қарашада теңге айналымға енді. Содан бері бұл күн ресми Ұлттық валюта күні болып саналады. 1993 жылдың 18 қарашасынан бастап теңге Қазақстан аумағындағы жалғыз заңды төлем құралы болды. Бүгінгі таңда теңге – тәуелсіздіктің символы және мемлекеттің ақша жүйесінің негізі.

2023 жылғы 13 қараша күні мемлекте басшысы Қасым-Жомарт Тоқаев Ұлттық банк төрағасы Тимур Сүлейменовті қабылдады. Тимур Сүлейменов президентке цифрлық теңгені іске қосуға дайындық жұмыстарының барысы және цифрлық қаржылық инфрақұрылымды дамыту жоспары жайында мәлімет берді.

Ұлттық валюта туралы қызықты деректер:

Қазақстан теңгесі – мәтіндері екі тілде қатар жазылған әлемдегі жалғыз валюта. Бұл тәжірибені 500 теңгелік банкноттан бастап енгізген.

Қазақстанға теңгенің алғашқы партиясы Ұлыбританиядан келді, ал 1995 жылы елімізде теңге шығаратын фабрика іске қосылды.

Қазір теңге Ұлттық банктің Алматыдағы банкнот фабрикасында және Өскемендегі монета сарайында басылады.

2007 жылы 29 наурызда теңгенің символы бекітілді.

Қазақстандық ақша халықаралық жарыстарда бірнеше рет бірінші орынды иеленді. Оның ішінде барыстың суреті бейнеленген 10 000 теңгелік, қалықтаған көгершін бейнеленген бес мың теңгелік және түркі жазуы мен мәдениетіне арналған мың теңгелік купюралар бар.

Теңгеде 18 қорғау дәрежесі бар, оның ішінде су таңбалары, микроқаріптер және т.б. Бүгінде біздің ақшамыз әлемдегі ең қауіпсіз валюталардың бірі саналады.

Банкноталардың дизайнында қазақ халқының мәдени-тарихи мұрасы бейнеленген. Теңге ел экономикасының барлық салаларында қолданылады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.