Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
© akorda.kz
Президент Қасым-Жомарт Тоқаев Республика күніне орай ұйымдастырылған салтанатты рәсімде тарихқа шегініс жасап, Қазақстанның Мемлекеттік егемендігі туралы декларация қалай қабылданғаны жөнінде сөз қозғады, деп хабарлайды mangystaumedia.kz сайты Zakon.kz-ке сілтеме жасап.
Мемлекет басшысы сөзін еліміздің ең басты мейрамы – Республика күніне құтты болсын айтумен бастап, бұл күннің маңызына тоқталды.
«Бұл – қазақтың мемлекеттілік дәстүрі қайта жаңғырған тарихи күн. Көк түріктер дәуірінен, Алтын Орда, Қазақ хандығы заманынан келе жатқан елдігіміз тамырын тапқан күн. Бұл – Алаш арыстарының азаттық жолындағы арпалысы ақталған күн. Халқымызда "Егемен болмай, ел болмас" деген сөз бар. Осыдан 33 жыл бұрын тарихи әділдік орнады. Қазақстанның Мемлекеттік егемендігі туралы декларация қабылданды. Осы маңызды құжат жұртымыздың азаттық алуына жол ашты», - деді Қасым-Жомарт Тоқаев
Президенттің сөзінше, егемендік декларациясын қабылдау оңайға соқпаған.
«Еліміздің ұлттық құрамы біркелкі емес еді. Сол кездегі Парламентте, яғни Жоғарғы Кеңесте және бүкіл қоғамымызда ұзақ пікірталас, қызу талқылау болды. Құжаттың әр сөзін, әр бабын қорғауға тура келді», - деді Президент.
Қасым-Жомарт Тоқаев Әлихан Бөкейханның "Бостандыққа апаратын жалғыз жол – ұлттық ынтымақ қана" деген сөзін келтіре отырып, ел ағалары халқымыздың ардақты ұлының бұл өсиетіне адал болғанын атап өтті.
«Олар жауапты сәтте ұйымшылдықпен ұлт мүддесін қорғай білді. Ақжолтай құжат жұртымыздың талап-тілегіне сай жазылды, отаншыл азаматтардың ақыл-парасатының арқасында қабылданды. Олардың сын сағаттағы батылдығын нағыз ерлік деп бағалауға болады», - деп жалғады Қасым-Жомарт Тоқаев.
Президент жиында сөйлеген сөзінде әділетті Қазақстан құрылып жатқанын, сондықтан өткен заманның қайраткерлеріне, олардың еңбегіне лайықты, әділетті баға беріп отыру қажет екенін айтты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.