Өткен жылдың қорытындысы бойынша энергетика секторындағы жер қойнауын пайдаланушылардың тауарларын, жұмыстары мен қызметтерін сатып алудың жалпы көлемі — 4,69 трлн. теңге. Осы сатып алулардағы жергілікті қамту үлесі 61,8%-ды (2,9 трлн.тг). Бұл туралы Энергетика министрі Болат Ақшолақов "Халықтың табысын арттырудың 2025 жылға дейінгі бағдарламасының" кешенді жоспарын іске асыру жөніндегі кеңесте айтты, деп хабарлайды mangystaumedia.kz ҚР Энергетика министрлігінің баспасөз қызметіне сілтеме жасап.
Ведомство басшысы жер қойнауын пайдаланушылардың тауарларды, жұмыстар мен қызметтерді сатып алу көлемінің шамамен 75%-ы 3 ірі операторға - ТШО, Қарашығанақ Петролеум Оперейтинг және NCOC, 13%-ы "Самұрық-Қазына" қорының компаниялар тобына және 12%-ы қалған жер қойнауын пайдаланушыларға тиесілі екенін атап өтті.
Болат Ақшолақов өткен жылы Қазақстан алдындағы өзінің қайта инвестициялау міндеттемелері шеңберінде "Шеврон" компаниясының жергілікті қамтуды дамытуға тікелей инвестициялар қоры құрылғанын, онда 248,5 млн. АҚШ доллары Қазақстан аумағында іске асырылатын стартап жобаларды қаржыландыру үшін бөлінгенін айтты. Қордың инвестициялары экономиканың барлық секторлары бойынша салынады.
Бірінші кезеңде 3 бағыт айқындалды: цифрлық технологиялар және IT, базалық тауарлар шығару және мұнай-газ секторына арналған жабдықтардың жекелеген түрлерін құрастыру, сондай-ақ қоршаған ортаны қорғау саласындағы жобалар. Қазіргі уақытта Қордың қадағалау кеңесінің қарауында IT және цифрлық технологиялар, сақтандыру қызметтері, агроөнеркәсіптік кешен және көлік салаларындағы өтінімдер жатыр. Қор "Астана"халықаралық қаржы орталығының алаңында тіркелген.
Барлық ниет білдірушілер Жергілікті қамтуды дамытудың тікелей инвестициялар қорының онлайн-платформасына өтінім береді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
