Аят Сүгірбай: Ер адамдарға психологиялық көмек көрсететін орталық қажет

Маңғыстау облыстық мәслихатының депутаты Аят Сүгірбай күйзеліске душар болған ер адамдарға көмек көрсететін психология орталық қажет екенін айтты, - деп хабарлайды mangystaumedia.kz.

Аят Сүгірбай бүгін Маңғыстау ауылында болған оқиғаны қоғам өкілі ретінде, ер азамат ретінде айыптайтынын айтты.

«Бұл мәселеге жан-жақты қараумыз қажет. Саналы қоғамның басты мақсаты — біреуді айыптау я жазалау емес, отбасыны сақтап қалу болуы тиіс. Сол себепті отбасын құрайын деп жатқан жастарға дұрыс ақыл беретін, әсіресе отбасылық мәселеге тап болған жастарға психологиялық көмек көрсететін қызмет қажет. Қазіргі сондай жағдайға тап болған, күйзеліске душар болған әйел адамдарға көмек көрсететін орталық бар. Ал ер адамдарға жоқ. Сондай орталықтың қажеттілігі туындап отыр деп есептеймін», - дейді Аят Сүгірбай.

Сондай-ақ Аят Сүгірбай статистика бойынша 90 пайыз ажырасуға бастамашы болып әйел адам баратынын тілге тиек етті.

«Көбіне ер адам ажырасуға бармайды. Ер адамдарға да психологиялық көмек көрсететін орталық қажет. Себебі қазіргі саясат бір жақты болып кеткен секілді. Сондықтан әйел/ер деп бөліп-жармай психологиялық көмек көрсету қажет. Ер адамның мәселесін бөлісетін анонимді болсын көмек қажет секілді», - дейді ол.

Аят Сүгірбай жалпы алғанда идеологиялық жұмыстар қарқынды жүруі қажет деп есептейтінін айтты.

«Отбасы мәселесі бойынша отбасы құрушы жастарға бағыт беретін жұмыстар жүргізілуі тиіс. Қазіргі таңда жастар жар таңдауда қателеседі. Оның соңы осындай жанжал, қантөгіске де алып келіп жатады. Ажырасудың басты мәселесі — жар таңдауда кеткен қателік», - дейді ол.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.