Қарақия ауданы әкімдігі тұрғындарды ашық алаңда кедергісіз қабылдайды

Қарақия ауданы әкімінің әлеуметтік мәселелер бойынша орынбасары Бауыржан Тұяқов бұдан былай қабылдау бөлімі бар жайлы кеңседе отырмайды.
Бүгіннен бастап әкімдік ғимаратының төменгі қабатына түсіп, кіре берістегі кабинеттің біріне көшті.

Осыған байланысты ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасары Серік Қаныбеков, «Маңғыстау – адалдық алаңы» жобалық кеңсесінің жетекшісі Дайрабай Үсіпбаевтар игі істің куәсі болды. Аудан басшыларын басқаларға үлгі боларлық жаңа бастамасымен құттықтап, сәттілік тіледі.

Халық үніне құлақ асатын ашық алаң құру мақсатында ашылған кабинеттің қабылдау бөлімі жоқ, ішкі аудитория көрініп тұратын шыны есігі бар.
Бауыржан Орынбайұлы осы кабинетте қабылдау кестесінсіз, аудан әкімдігіне жүгінген кез-келген тұрғынды тұрақты қабылдап, арыз-тілегін тыңдайтын болады.

Айта кетейік, Қарақия ауданы әкімдігі жаңа бағытқа ҚР Президентінің «Сындарлы қоғамдық диалог - Қазақстанның тұрақтылығы мен өркендеуінің негізі» атты Қазақстан халқына Жолдауын жүзеге асыру, қоғамдағы ашықтықты қамтамасыз ету мақсатында және "Адалдық алаңы" аясында бастамашы болды.

Шынар КЕНДІН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.