Ақтауда "Ана - әлемнің шамшырағы" атты тренинг өтті

Бүгін, 12 қараша күні Абай атындағы мәдени-демалыс кешенінде «ЖСДП» партиясының МО филиалы мен «Шуағыңды шаш» ҚБ-нің ұйымдастыруымен көпбалалы аналарға арналған семинар-тренинг өтті, - деп хабарлайды mangystaumedia.kz сайты. Ақтау қаласы әкімдігінің бастамасымен өткен шараға 50-ге жуық әйел қатысты. Ал тренингтің спикерлері бизнес-тәлімгер Шолпан Түсіпбекова мен «Бәйшешек» қорының директоры Алтын Сақтағанова болды. Отбасы құндылықтарын салт пен дәстүрге ұштастырған спикер Шолпан Түсіпбекова өз тәжірибесімен бөлісіп, жиналған аналарға мотиватор бола білді. Ал Алтын Сәрсенқызы бірнеше жылдық тәжірибесінде кездескен ерекше оқиғаларды айтып, тыңдаушыларды айрықша көңіл-күйге бөледі. Өздерінің өзгерістерін баяндаған әйелдер осындай жақсы бастамаларға бастайтын тренингтердің берері мол екенін жеткізді. - Бүгінгі тренингтегі көңіл-күйімді сөзбен айтып жеткізе алмаспын. Барлығы күшті болды. Өзімізбен жұмыс жасауды әлдеқашан қолға алдық. Дегенмен, бұндай тренингтің пайдасы болмаса, зияны жоқ деп ойлаймын. Ұйымдастырушыларға алғысымды білдіргім келеді, - дейді көпбалалы ана Назерке Мақатаева. Ұйымдастырушылар аналарға материалдық қамқорлықтан бөлек рухани қолдаудың қажеттілігін ескерген. «Ақжүніс» аналар қоғамы мен «Шуағыңды шаш» қоғамдық бірлестігі көпбалалы аналардың жан азығы бола білетін іс-шараны өткізуде жетекшілік етеді. Ұйымдастырушылардың айтуынша, көпбалалы аналар үшін жасалатын семинар-тренингтер алдағы уақытта жалғасын табады.

Махаббат НҰРЖАНҚЫЗЫ

Суреттер автордан