200 балаға қамқорлық жасалды

Ақтау қаласындағы №14 мектепте өткен шарада ҚР Тұңғыш Президенті-Елбасы қоры атынан 200 балаға мектепке қажетті сөмкелер мен керек-жарақтар табысталды. Қайырымдылық шарасына ҚР Тұңғыш Президенті-Елбасы қорының бас маманы Гүлнар Ершіманова мен облыстық білім басқармасы басшысының орынбасары Айжақсы Тұржанова арнайы қатысты.

-Қор мамандары акция аясында республикамыздың жеті аймағында болып, әлеуметтік жағынан аз қамтылған, тұрмысы төмен, көп балалы отбасылардың балаларына мектепке қажетті сөмкелер мен басқа да керек-жарақтар үлестірді. Бұл-дәстүрге айналған игі шара. Жақында Атырау облысында болып қайттық. Бүгін міне, Ақтау қаласындамыз, ертең Жаңаөзен, Форт-Шевченко қалаларына барып, оқушыларды мектепке қажетті құрал-жабдықтармен қамтамасыз етеміз. Жалпы Маңғыстау облысы бойынша 500 балаға көмек көрсетілетін болады. Мұндай игі шаралар алдағы уақытта да жалғасын табады,-дейді ҚР Тұңғыш Президенті-Елбасы қорының бас маманы Гүлнар Ершіманова.

Шарада қордың жеке тапсырысы бойынша ерекше сәнмен тігілген сөмкелер мектеп оқушыларына салтанатты түрде табысталды. Сыйлыққа ие болғандардың арасында 5-сынып оқушысы Данияр Айтанов та бар.

-Отбасымызда менен бөлек үш інім, екі қарындасым бар. Біздерді киіндіру, мектепке дайындау ата-анамызға үлкен салмақ салады. Сондықтан да бізге сыйлық жасап, әдемі сөмке мен құрал-жабдықтарды тарту етіп жатқан ұйымдастырушыларға алғыс айтамын. Ата-анамның үмітін ақтап, сабақты жақсы оқып, үздіктер қатарынан көрінуге тырысамын,-дейді Данияр Айтанов.

ҚР Тұңғыш Президеті-Елбасының қоры бұл акцияны биыл жеті жыл қатарынан ұйымдастырып келеді. Осы жылдар аралығында 7000-нан астам мектеп оқушысына қайырымдылық көмектер көрсетілген. Қор мамандарының айтуынша, әр балаға жұмсалған шығын 10 мың теңгені құрайды.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.