Маңғыстауда медицина қызметкерлерінің жалақысы көтерілді
[ 2019 ] 11 шілде, 12:17 | Жаңалықтар
Маңғыстауда медицина қызметкерлерінің жалақысы 30 пайызға өсті. Ол үшін бюджеттен 1 млрд 880 млн теңге бөлінген. Соның 228 миллионы маусым айының жалақысына жұмсалған. Бұл туралы брифингте МӘМС Қоры Маңғыстау филиалының директоры Бақыт Исмаханбетов мәлімдеді, - деп хабарлайды mangystaumedia.kz сайты.
"Жыл басынан бері тарифтерді екі рет көтердік. Бірі медицина саласындағы жалақысы төмен мамандардың айлығы көтерілді. Ал екінші кезеңде медицина ұйымдарындағы барлық қызметкерлердің жалақысы өсті", - дейді Бақыт Торғайбайұлы.
Бұдан бөлек, биыл Маңғыстауға 117 медицина қызметкері келеді деп жоспарланып отыр. 2019 жылдың 6 ай қорытындысы мен емдеу сауықтыру мекемелерінің ақпараты бойынша Маңғыстау облысына 250-ге жуық дәрігер мамандары қажет. Қалалық жерге 127 дәрігер, ауылдық жерге 123 дәрігер жетіспейді екен.
"Мұнайлы орталық аудандық ауруханасына 18, Түпқараған орталық аудандық ауруханасына 4 маман жетіспейді. 2 маман Маңғыстау орталық аудандық ауруханаға, 7 дәрігер Қарақиядағы орталық ауруханаға керек. Ал Жетібай ауылдық аурухана 9 дәрігерді, Бейнеу орталық аудандық аурухана 13 дәрігерді қажет етіп отыр. Боранқұл ауылдық ауруханаға 1 маман, Жаңаөзен қаласына 69 маман керек", - дейді Маңғыстау облыстық денсаулық сақтау басқармасының мамандары.
Айтуынша, өңірге жалпы тәжірибелі дәрігерлер, кардиологтар, нейрохирургтар, акушер-гинекологтар, анестезиолог-реаниматологтар, неонатологтар, онкологтар, клиникалық фармакологтар, инфекционистер, сәулелі диагностикалық дәрігерлер, физиотерапевттер, психиаторлар (наркологтар), офтольмологтар, отоларингологтар жетіспейді.
Осы проблемаларды жою мақсатында емдеу сауықтыру мекеме басшылары 2019 жылы 7 жоғары оқу орындарының бос орын жәрмеңкесіне барып, 84 жас маманмен шарт жасақтасып келді.
1257
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
