Бүгін композитор, Қазақстанның халық әртісі, Қазақстан мәдениетіне еңбегі сіңген қайраткер, Шымкент, Тараз, Жетісай қалаларының құрметті азаматы Шәмші Қалдаяқовтың туғанына 88 жыл толды.
Ол 1950 жылы Сарыағаштағы Қапланбек малдәрігерлік техникумын бітірген.
1951 – 1954 жылдары Қиыр Шығыста әскери борышын атқарған.
1955 жылы Ташкенттегі музыка училищесінің музыка теориясы факультетіне қабылданды.
1956 – 1962 жылдары Алматы мемлекеттік консерваториясының композиция факультетінде (профессор В.В. Великановтың класы бойынша) білім алған.
Музыка әлемінде ерекше орны бар сазгердің 300-ге жуық әні бар. Оның әндері құлаққа жағымды, жүрекке жылы қабылданып, жұртшылықтың сүйіспеншілігіне бөленді. Композитор шығармаларының тақырыптық, мазмұндық ауқымы аса кең. Елге, жерге, Отанға, ата-анаға, жарға, дос-жаранға деген сүйіспеншілік – Шәмші шығармаларының басты тақырыбы.
Оның «Ақ ерке – Ақ Жайық», «Арыс жағасында», «Сыр сұлуы», «Жарқырайды Жезқазған», «Қарқаралы», «Фосфорлы Жамбыл», «Байқоңыр», «Талдықорған – әнім менің», «Ырысты өлке – Шардара», «Отан», «Теріскей», «Мойынқұмда», «Отырардағы той», «Көгілдір Көкше», «Өмір өзен», т.б. туындыларын жұртшылық ерекше ықыласпен қабылдады. Бүгінде Қазақстан Республикасының Әнұранына айналған «Менің Қазақстаным» әнінің авторы.
1992 жылдан бастап сазгерлер мен әншілер үшін Қалдаяқов атындағы халықаралық байқау-фестиваль дәстүрлі түрде өткізіліп тұрады. Шымкент қаласында облыстық филармония, бір көше, Алматы қаласында бір көше, композитор туған өлке – Шәуілдір ауылындағы музыка мектебі – Қалдаяқов есімімен аталады. Шымкент филармониясының алдына Қалдаяқов ескерткіші орнатылған. 1991 жылы Қалдаяқов жайлы ғұмырнамалық «Жылдарым менің, жырларым менің» деген деректі телефильм түсірілді. 2002 жылы «Шәмшіғұмыр» естеліктер мен мақалалар жинағы жарық көрді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
