Былтыр Маңғыстауда 284 өрт оқиғасы тіркелген

2017 жылы Маңғыстау облысы аумағында 284 өрт оқиғасы тіркеліп, 225 млн. 205 мың теңге материалдық шығын келген. Өрт кезінде 7 адам қаза тауып, 19 адам жарақат алған. Бұл туралы ӨКҚ-де өткен брифингте айтылды.

Төтеншеліктердің айтуынша, өрт көбінесе тұрғын-үй секторында шығады екен. Былтыр 122 үйдегі өрт оқиғасы тіркелсе, 101 оқиға автокөліктерден шыққан.

Сондай-ақ есепті кезеңде 93 адам құтқарылып, 553-і қауіпсіз жерге көшірілген. Ал зардап шеккендердің 88-іне алғашқы медициналық көмек көрсетілген.

"2017 жылдың қаңтар айында автокөлікте 11 өрт оқиғасы тіркелді. Биыл – 10. Негізгі себептері – қысқаша тұйықталу. Көбіне ескі көліктер жанып кетеді. Сонымен қатар оған көлікке орнатылған газ қондырғысы да әсер етеді. Маңғыстау – республика бойынша көліктерге ең көп газ қондырылған облыс. Сондықтан осы күндері автокөліктедің жануы жиі кездеседі. Былтыр да, биыл да қаңтар айында 23 өрт оқиғасы тіркелді", - дейді Маңғыстау облысы Төтенше жағдайлар департаментінің Өрт қауіпсіздігі саласындағы бақылау және профилактикалық қызмет басқармасы Нұржан Борашев.

Мамандар өрттің алдын алу мақсатында нұсқаулықтар таратып, жиын, дәрістер өткізеді. Сондай-ақ жүйелі түрде сенбіліктер өткізуді қолға алған.

Теңге БЕКМҰРЗАЕВА

Суретті түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.