Жағдайының ауырлығына байланысты екі бала Ақтауға жеткізілді

Апаттан зардап шеккен 2 бала жағдайларының ауырлығына байланысты санитарлық авиацияның көмегімен облыстық балалар ауруханасына жеткізілген. Бұл туралы бүгін Денсаулық сақтау басқармасы басшысының міндетін атқарушысы Клара Оралбаева өңірлік коммуникациялар қызметінде өткен брифингте айтты.

- Бүгінгі таңда балалардың жағдайы - өте ауыр, аппаратта.  Өкінішке қарай, 10 жасар қыздың аяқ жарақаты өте қауіпті болғандықтан, ампутация жасауға тура келді. Мұны айтудың өзі қиын.  

Бұған дейін айтып өткеніміздей, 9 адам оқиға орнында тілге келместен қаза тапты.

- 27 адам жедел жәрдеммен Жаңаөзен қалалық емханасына әкелініп, оларға дер кезінде көмек көрсетілген. 9 адам реанимацияға, 18 адам травмотология бөліміне түсті. 9 адамның бүгінгі таңда 3-еуі облыстық орталыққа тасымалданды, 1-еуі облыстық аурухананың нейрохирургия бөліміне жеткізілді. Жаңаөзен бойынша реанимация бөлімінде жатқан 6 адамның 1-еуіне аппарат қойылған. Қалған науқастар аппараттан ажыратылғанымен жағдайлары ауыр, бірақ тұрақты, - дейді Клара Оралбаева.

https://youtu.be/Ptm_7C_QQQs Сонымен бір мезетте 27 адамға көмек қолын созу үшін Жаңаөзендегі демалыста болған барлық дәрігерлер мен медбикелер жұмысқа шыққан, облыстан келген бас дәрігерлер де бар.  Сондай-ақ, ҚР Денсаулық сақтау Министрлігінің  қолдауымен Астанадан балалар травмотологы мен  хирург маман Маңғыстауға келді.

- Кешкі рейспен келген астаналық дәрігерлер Жаңаөзенге жетіп, таңғы 4-ке дейін науқастарға емдік зерттеуін жасады, - дейді Клара Оралбаева. Жаңаөзен дәрігерлері қойған ем-домына Астана мамандары келісімін берді.

Айгүл ДӘДЕН

Суретті түсірген Серік МАЙЕМЕРОВ