Маңғыстауда 86 бала онкологиялық ауруға шалдыққан

©

Елімізде жыл өткен сайын адам бойындағы қатерлі ісік түрлері көбейіп келеді. Олардың ішінде балалар арасында кездесетін қатерлі ісіктің де жыл санап көбейіп отырғаны дәрігерлер қауымын алаңдатуда. Осыған орай балалар арасындағы қатерлі ісікті ерте және дер кезінде анықтау, уақытылы ем-дом жасауды машықтандыру мақсатында облыстағы 25 дәрігердің қатысуымен арнайы оқыту курстары ұйымдастырылды. Облыстық балалар ауруханасында өтіп жатқан оқыту курсына Алматыдан келген білікті маман, педиатрия және балалар хирургиясы ғылыми орталығы онкогематология бөлімінің меңгерушісі, медицина ғылымдарының кандидаты Нигар Асламбекова қатысып, дәрігерлерге дәріс оқып, тәжірибесімен бөлісуде.

- Балаларда кездесетін қатерлі ісіктердің алғашқы сатыларында ерте анықтау мақсатында дәрігерлерді сол аурулардың түрімен, қалай басталатыны жөнінде жалпы мағұлматпен таныстыру үшін оқыту ұйымдастырылып отыр. Балалар арасындағы кез-келген аурудың алғашқы белгісін байқаған сәттен сырқаттың алдын-алуға күш салу керек. Сонда ғана дені сау ұрпақ өсіруге мүмкіндік мол болады. Ол үшін балаларды жиі медициналық тексеруден өткізіп тұруымыз қажет. Әсіресе қан аурулары мен қатерлі ісік ауруларын болдырмау үшін дәрігерлер бар күшін салуы тиіс. Қатерлі ісік алғашқы сатыларында анықталса, баланың толық жазылып кетуіне мүмкіндік бар. Егер үлкен сатыларында болса, одан жақсы нәтиже күту қиын. Ондай жағдайда дәрі-дәрмекке жұмсалатын қаржы да, уақыт та текке кеткен болуы мүмкін. Сондықтан да дәрігерлер қауымы аты «жаман» ауруды ерте анықтауға атсалысулары керек. Жалпы Қазақстан бойынша жыл сайын 600-ге жуық бала онкологиялық және онкогематологиялық аурулармен ауырады,-дейді педиатрия және балалар хирургиясы ғылыми орталығы онкогематология бөлімінің меңгерушісі, медицина ғылымдарының кандидаты Нигар Асламбекова.

Маңғыстау облыстық балалар ауруханасының онкогематолог-дәрігері Назгүл Айсақызының айтуынша, бүгінгі таңда аймақта 86 бала онкологиялық аурулармен есепте тұр. Тарқатып айтар болсақ, лейкоздан (қан түзілу жүйесінің қатерлі ауруы) - 32, бас миының қатерлі ісігінен - 11, ретинобластомадан (көз торының жетілмеген эмбриональдық клеткасынан дамыған қатерлі ісік) - 14, нейробластома (симпатикалық жүйке жүйесінде болатын қатерлі ісік), нефробластома (бүйректің қатерлі ісігі), гепатобластомадан (бауырдың қатерлі ісігі) - 25, лимфомадан (лимфоидтық тіннің әртүрлі топтарындағы қатерлі ісік) - 4 бала есепке алынған.

Венера МИРЛАН

Басты сурет canamo.cl сайтынан алынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.