Маңғыстауда қолөнершілер одағы құрылды

©

Осы жылдың мамыр айында Іскер әйелдер кеңесінің «Маңғыстау облысының қолөнер шеберлері одағы» құрылған болатын. Оның президенті болып ҚР Мәдениет қайраткері, «Хас Шебер» атағын иеленген Қазақстандағы жалғыз әйел, қолөнерші Әуес Сағынаева тағайындалды. Осыған орай, ӨКП алаңында қауымдастықтың қызметі жөнінде баспасөз мәслихаты өтті.

- Осы кәсібіміздің арқасында бірнеше рет шетелге барып келдім. Өзге елдерде қолөнердің қалай дамып жатқанын, кәсіпкерлерге қалай қолдау көрсететінін көріп жүрмін. Сондықтан осы Маңғыстауда да қолөнерді дамытып, оны биікке көтерсек деген арманым бар еді. Біздің шеберлеріміз әртүрлі бұйымдар жасаумен айналысады. Соңғы кезде жүннен бұйым жасау үрдіске айналып кетті. Мен өз білгенімді, жиған тәжірибемді осы Маңғыстау шеберлеріне үйретіп, жалғастырып келемін деп айтсам да болады. Қазір үйренгісі келетін жастардың қарасы біршама. Оған да көңіл бөлуіміз керек. Алдағы уақытта уақытта тренингтер мен мастер-кластар өткізіп, көрме-жәрмеңке ұйымдастыруды жоспарлап отырмыз. Өз бұйымдарымызды шетелге шығару да алдағы мақсаттың бірі, - дейді Әуес Сағынаева.

Аталмыш ассоциацианың ашылуы облысымыздың этно-туризмінің дамуына өзіндік үлесін қосады. Халқымыздың ежелгі киіз басу, зергерлік бұйым жасау, кілем тоқу, ұлттық музыкалық аспаптар дайындау т.б. өнерін қолөнер шеберлері одағы жаңғыртатын болады. Олардың өз елімізде ғана емес, халықаралық деңгейге шығуына ықпал ететін болады.  Тамыз айында Экспо-2017 халықаралық көрмесіне жиырма шақты шебердің аттанып, бұйымдарын ұсынуын осының бастамасы деуге болады. Іскер әйелдер кеңесінің төрайымы Сәуле Салихова қолөнершілерге барлық қолайлы жағдай жасалатынын да айта кетті.

 - Қолөнер шеберлерінің одағы ең алғаш Маңғыстауда ашылып отыр. Бұған мұрындық болған іскер әйелдер қоғамдық қоры кеңесінің Сәуле Халелқызы. Қолөнершілеріміз үйінде отырып небір түрлі бұйымдарды тігіп, жасап шығарады. Бірақ оны қайда апарырын білмейді, тұтынушылар да бейхабар. Сондықтан шеберлердің басын қосып, бір жерге топтастыруды көздедік. Неге ұлттық өнерімізді дамытып, шетелге шығармасқа? Біздің Маңғыстаудың қолөнері өте керемет. Оны неге дамытпасқа? Шетелден келген туристерге дәстүрімізді, салтымызды, біздің қалай жүн сабап, өрмек тоқып жатқанымызды, киіз басқанымызды көрсететін болсақ, міне, керемет! – деген қауымдастық президенті Әуес Сағынаеваның сөзінің жаны бар. Өлкемізде дәстүрлі қолөнерді өлтірмей, жалғап келе жатқан шеберлер аз емес. Одақ оларды бір орталыққа біріктіріп, осы олқылықтың орнын толтыруды көздеп отыр.

Ассоциацианың алға қойған мақсаты айқын, сенімі нық. Еуропа, Азия көлеміндегі көрме-жәрмеңкелерге қатысуғы ниеттеніп отыр.

Теңге БЕКМҰРЗАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.