ЭКСПО-ға биіктігі үш метрлік алып асық сыйға тартылды
[ 2017 ] 13 маусым, 04:45 | Жаңалықтар
Шығыс Қазақстан облысының тұрғыны ЭКСПО көрмесіне алып асықты сыйға тартты.
Алып дүниені жасап шығуға 50 мың кәдімгі асық пайдаланылған, оның ұзындығы - 4 метр, ал биіктігі - 3 метр.
Болат Тағабай әлемдегі ең көп асық жинаған әрі ұлттық ойынды насихаттаушы ретінде Гиннес рекордтар кітабына енген қазақ. Ол ШҚО-ның Тарбағатай ауданындағы Ырғызбай әулие мұражайының директоры.
Автор алып асықты құрастыруға алты ай уақыт жұмсаған. Алдымен елу мың асықты жуып кептіруге - екі ай, одан сым темірмен конструктор мүсінін тоқуға тағы екі ай кеткен. Автор алып асығын алдағы күндері жұмыс сапарымен Өскеменге барғалы отырған Елбасыға сыйға тартуды көздеп отыр.
Оның айтуынша, елімізге келген шетелдік туристерге қазақтың ұлттық құндылықтарын паш ететін осындай дүниелер көп болуы керек.
«Алдағы үш айда дүйім жұрттың назары Астанаға ауады. Бұл қазақты әлемге танытудың бір жолы. Имидждік дүние деп атауға да болады. Алып асығым ЭКСПО-ға келген қонақтардың көзайымына айналады деп сенемін», - деді алып асықтың авторы.
Айта кетейік, Б.Тағабайдың асық жинай бастағанына 16 жыл болған. Бүгінде оның қоржынында 100 мыңға жуық асық бар. Оның 50 мыңынан елордаға келгелі отырған алып асық құрастырылды. Бұл дегеніміз 25 мың қоймен пара-пар.
Дереккөз:
inform.kz
1070
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
