Әлеуметтік жобалар сапалы болуы тиіс

Ел Тәуелсіздігінің 25 жылдығы аясында облыс орталығында «Мемлекеттік органдар мен үкіметтік емес ұйымдардың арасындағы өзара қарым-қатынасы» тақырыбында VІІ Азаматтық форумы өтті. Форум жұмысына аудан мен қала әкімдері, мемлекеттік орган басшылары, облыстық, аудандық және қалалық мәслихаттың депутаттары, ҮЕҰ мен кәсіподақ жетекшілері, саяси партиялардың, діни ұйымдардың, отандық және шетелдік бизнес компанияларының өкілдері қатысты.

Форум өңірдің үкіметтік емес ұйымдарының әлеуметтік жобалар көрмесімен басталды. Көрме жұмысымен танысқан аймақ басшысы Алик Айдарбаев билік пен ҮЕҰ арасындағы әріптестіктің басым бағыттары отбасы мен неке институтын, жанұялық дәстүрлерді, салауатты өмір салтын насихаттайтын, дарынды жастардың шығармашылығын дамытатын, тарихи және мәдени мұраларға деген сыйластықты, мүгедек жандарға, халықтың әлеуметтік тұрғыдан әлсіз тобына деген қамқорлық сезімдерін оятататын жобалар болуы керектігін айтты.

-ҮЕҰ-дарды қоғамдық маңызды шешімдер қабылдайтын сарапшылық жұмыстарға кеңінен тарту қажет. Аудан мен қала әкімдері ҮЕҰ-дардың қолдауымен жергілікті деңгейде шаралар кешенін дайындап, әлеуметтік маңызды жобаларды жүзеге асыру үшін бюджеттен қаржы қарастыру қажет. Бұл орайда ҮЕҰ-дардың қатысуымен Қоғамдық кеңестердің мүмкіншіліктерін жоғары тұрғыда пайдалану керек. Мемлекетті бөлінген қаражаттың тиімдіжұмсалуы меноның пайдаланылуы алаңдатады. Сондықтан біздің тарапымыздан іске асырылатын әлеуметтік жобалардың сапасы тұрғысынан ҮЕҰ-дарға деген талап күшейтіледі. Әртүрлі мәселелербойынша тұрақты диалогқа негізделген бірлескен жұмыс қана алдымызға қойған мақсаттарға жетуге мүмкіндік береді,-деді Алик Айдарбаев.

Өңірде ресми түрде 508 ұйым тіркелген. Оның ішінде бүгінгі таңда 382 ұйым қызмет етіп, 90-ы белсенді жұмыс жасап тұр. ҮЕҰ-дардың 40%-ы әлеуметтік қорғау саласында, 20%-ы жастар саясаты, 9 %-ы азаматтардың құқығын қорғау бағытында қызмет етсе, 16 %-сы салауатты өмір салтын қалыптастыру бойынша, қалған 15%-і білім саласының сапасын арттырумен, өңірдегі экологиялық тұрақтылықты сақтаумен, гендерлік саясатты жүзеге асырумен айналысады.

-ҮЕҰ белсенділігін арттыруға және жергілікті биліктің қарым қатынасын нығайтуда мемлекеттік әлеуметтік тапсырыстың рөлі ерекше. Егер 2006 жылы облыстық бюджеттен коммерциялық емес салаға барлығы 14 млн.теңге қарастырылса, 2016 жылы мемлекеттік әлеуметтік тапсырыстың көлемі 240 млн.теңгеге артты. Бұл қаржыға 40 ҮЕҰ 18 жергілікті атқарушы органдармен бірлесе 87 әлеуметтік маңызды жобаларды жүзеге асырылуда. Әлеуметтік жобаларды жүзеге асыруда 1,5 мың адам жұмылдырылып отыр,-дейді Маңғыстау облыстық Азаматтық альянсы ЗТБ президенті Жібек Ахметова.

Форумда қоғамдағы мәселелерді шешуге бағытталған әлеуметтік жобалар шеңберінде биліктің, бизнес пен ҮЕҰ-дардың әріптестігін одан әрі дамыту, қоғамдық ұйымдардың аудан мен ауыл өміріне араласуы, бизнес пен халықаралық ұйымдар субъектілерінің әріптестік жобалары талқыланды. Шарада «Жергілікті өзін-өзі басқарудағы ҮЕҰ ролі мен жергілікті өзін-өзі басқаруды дамытудағы ҮЕҰ тәжірибесі» тақырыбында БҰҰ Даму бағдарламасының Маңғыстау облысы бойынша кеңесшісі Ж.Кенжебаева, «Жергілікті биліктің үкіметтік емес ұйымдармен серіктестікті нығайту бағытындағы тәжірибелер тақырыбында «Шаңырақ» ҚҚ директоры Р.Иглікова, «Тұрғындарға әлеуметтік көмек көрсетудегі үкіметтік емес ұйымдардың ықпалы» тақырыбында «РАЙ жедел әлеуметтік көмек көрсету орталығы» ЖМ директоры Р.Бекманова, «Қоғамдық ұйымдардың аудан, ауылдың қоғамдық саяси өміріне араласуы» тақырыбында «Түпқараған жастары» ҚБ төрағасы Н.Мағдатов баяндама жасап, атқарылған жұмыстар бойынша есеп берді.

-Біздің ұйым жыл басынан бері көптеген істерге ұйытқы болып, облыс көлемінде өткен біраз шараларға белсене араласты. Бір ғана мысал келтіре кетейін Оңды ауылында тұратын, туғалы мектеп табалдырығын көрмеген, мүгедек жігіт біздің қордың қолдауымен білімін жетілдіріп, компьютермен жұмыс жасауды үйренді. Бүгінде өз кәсібін жүргізіп отырған білікті маманға айналды. Осындай мүмкіндігі шектеулі жандардың қоғам өміріне белсене араласуына септігін тигізіп жүрген ұйымымыздың алға қойған мақсаттары зор,-дейді «Шаңырақ» ҚҚ директоры Рысгүл Иглікова.

Форум аясында облыс басшысы А. Айдарбаев өңірдегі азаматтық қоғам қызметінің дамуына үлесін қосып жүрген бірқатар үкіметтік емес ұйымдарға алғысхаттар табыстады. Форум соңында қатысушылар осы жылдың 25-қараша күні Астана қаласында өтетін республикалық VII Азаматтық форумға Маңғыстау атынан қатысатын делегаттарды сайлады.

Венера МИРЛАН,

Суреттерді түсірген Талант ҚҰСАЙЫН.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.