Маңғыстаулық самбошылар - Ел чемпионы атанды!

Семейде Қабанбай батыр мемориалына арналған самбо күресінен ересектер арасында ҚР-ның Кубогы үшін өткен жарыс аяқталды. Бәсеке қорытындысында командалық есепте бірінші орынды маңғыстаулық самбошылар иеленіп, облыс мерейін асқақтатты. 1999 жылдан бері ұйымдастырылып келе жатқан жарыстың Кубогы алғаш рет маңғыстаулық самбошыларға бұйырды. Қуанышты жаңалықпен облыстық «Жастар» балалар мен жасөспірімдер спорт мектебінің басшысы Манарбек Бисекенов бөлісті.

Ел атағын асқақтатқан бәсеке Семей жерінде 20-22 қазан аралығында өтті. Дүбірлі додаға еліміздің барлық аймағынан жиылған 237 самбошы қатысып, күш сынады. Мықтылардың арасынан облыстық «Жастар» балалар мен жасөспірімдер спорт мектебінің балуандары 52 келі салмақта белдескен Мерей Ералиев, Рамазан Мамаев (57 келі салмақта), Талғат Қуанай (62 келі салмақта), Бағдат Ерғазы (68 келі салмақта), Ерлан Серіков (74 келі салмақта), Манас Иманқұлов (82 келі салмақта), Асхат Хапанов (90 келі салмақта), Ғайса Қалмұханов (100 келі салмақта), Ақылбек Айжарықов (+100 келі салмақта) алтынмен апталды. Жеңіс тұғырының ең биік сатысына көтерілген балуандарымыз бұған дейін әр түрлі халықаралық жарыстар мен елішілік бәсекелерде оза шауып жүр. Бұл жолы да олар өздерінің мықтылығын өзгелерге мойындатты. Осылайша, Маңғыстау тарихында алғаш рет самбошылар командалық есепте рекордтық көрсеткіш орнатып, жерлестеріне үлкен жеңіс сыйлап, қуаныш пен шаттыққа бөледі. Жарысқа балуандарды облыстың самбодан бас жаттықтырушысы Манарбек Бисекенов пен ҚР еңбек сіңірген бапкері Берік Жұмағалиев дайындады.

– Біз бұл биік дәрежеге, толағай табысқа, үлкен жеңіске қаншама жылғы еңбекпен жеттік. Аталмыш жарыста 16 жыл қатарынан командалық есепте бірінші орынды шығыс қазақстандық самбошылар иеленіп келді. Маңғыстаулық самбошылар биыл рекордты жаңартып, өлке тарихында алғаш рет командалық есепте бірінші орынды қанжығалады. Бүгін біз өте қуаныштымыз, үмітіміз ақталды, шүкір. Қаншама жылдар бапкерлердің төккен еселі еңбегінің жемісі нәтижесін берді. Жеңісімізді Ел Тәуелсіздігінің 25 жылдығына арнаймыз. Жоғары деңгейде боз кілемде белдескен барлық самбошыларға алғыс айтамын. Бірінші орынды иеленген самбошыларымызға «Самбодан ҚР-ның спорт шебері» деген атақ та қоса берілді. Сондықтан да жыл бойына өткен барлық жарыстарға қатысуға мүмкіншілік жасаған облыстық спорт басқармасына және облыстық самбо федерациясының басшылығына ризашылығымызды білдіреміз. Алдағы жарыстарда да Қазақстанның әнұранын шырқатып, туын биікте желбірету үшін талмай еңбек ететін боламыз, — деген облыстық «Жастар» балалар мен жасөсіпірімдер спорт мектебінің басшысы Манарбек Бисекенов, маңғыстаулық самбошыларға 2017 жылдың қаңтар айында Мәскеуде өтетін Әлем Кубогіне жолдама берілгенін айтты.

Сонымен жарыстың қорытындысында командалық есепте маңғыстаулық балуандар бірінші орынды иеленіп, жарыс жеңімпазы атанса, екінші орынға шығыс қазақстандық самбошылар табан тіреді. Үшінші орынға ақтөбелік самбошылар жайғасты.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.