Ақтауда карантинді сақтау бойынша мобильді топтар жұмысы жалғасуда. Полиция қызметкерлері, әкімдік өкілдері, маслихат депутаттары дүкендерді, сауда орталықтарын, мейрамханаларды және басқа да кәсіпкерлік субъектілерді тексеріп жатыр, деп хабарлайды mangystaumedia.kz.
Кеше түні болған рейд кезінде 24:00-ден кейін де жұмысын жалғастырған Ақтаудағы «Kyber» және «Game Studio» компьютер-клубтарында адам лық толы екені анықталды. Маскалық режим мен әлеуметтік арақашықтық мүлдем сақталмаған. «Hesoyam game club» ойын-клубында және «Папа бар» кафесі «Mango» караоке бары санитарлық талапты мүлде ескермеген, делінген Ақтау қаласы әкімдігінің баспасөз қызметі таратқан ақпаратта.
Осы және өзге те тәртіп бұзушылықтар ресми түрде тіркеліп, дәмхана қожайындарына хаттама толтырылды. Әрі қарай тиісті шара қолдану үшін санитариялық-эпидемиологиялық қадағалау органдарына жолданды.
Мониторинг тобының өкілдері вирус таралуына ықпал етіп, адамдар өмірін қауіпке тіккендер жауапкершілікке тартылатынын ескертеді.
Сонымен бірге, кәсіпкерлік субъектілерінің басшыларына санитарлық-эпидемиологиялық талаптарды бұзу бірнеше рет қайталанған жағдайда, ҚР қолданыстағы заңнамасы шеңберінде кәсіпкерлік субъектілерінің қызметін уақытша тоқтата тұру шарасы қолданылады.
Ақтау қаласының әкімдігі тұрғындар мен кәсіпкерлерді барлық қажетті санитарлық нормаларды және азаматтар алдындағы әлеуметтік жауапкершілікті сақтауға шақырады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
