Маңғыстаулық мектеп түлектері ҰБТ-ны компьютермен тапсырады

Биыл Маңғыстауда 6 617 түлек 11 сынып бітіреді, 230 түлек «Алтын белгіге» үміткер. Облыс түлектерінің барлығы ҰБТ тапсыруға ниетті. Биылғы ҰБТ өткізуде бірнеше өзгеріс енгізілді. Бұл туралы Маңғыстау облысының қоғамдық коммуникация орталында өткен брифингте Облыстық білім басқармасының басшысы Светлана Төлебаева мәлім етті.

Оның айтуынша мемлекеттік грантқа түсу үшін ҰБТ мамырда басталып, 30 маусымға дейін жалғасады. Өтінішті http://app.testcenter.kz/ сайты арқылы беруге болады.

«Компьютерлік тестілеудің бір артықшылығы – ҰБТ нәтижелерін тестілеу аяқталғаннан кейін бірден білуге болады. Сондай-ақ ҰБТ қатысушысы қандай сұрақтарға қате жауап бергенін бірден көре алады. Талапкерлерге ыңғайлы болу үшін ҰБТ барысында компьютер экранында калькулятор, Менделеев және тұздардың ерігіштігі кестелері қолжетімді болады. ҰБТ нәтижелерімен келіспеген жағдайда талапкер келесі күнді күтпей-ақ апелляцияға өтініш бере алады. Талапкердің смартфон, шпаргалка және т.б. тыйым салынған заттарды пайдаланғаны анықталса, тестілеу автоматты түрде тоқтатылып тестіленушінің нәтижесі жойылады», - деді Светлана Төлебаева.

Ашықтық пен объективтілікті қамтамасыз ету үшін ҰБТ-ны өткізу рәсіміне ҚР Сыбайлас жемқорлыққа қарсы іс-қимыл агенттігінің Арнайы мониторингтік тобы мен «Адалдық алаңы» жобалық кеңсесінің өкілдері шақырылады.

Академиялық адалдық қағидаттарының сақталуын бақылауды күшейтуге мүмкіндік береді. ҰБТ барысында барлық санитарлық-эпидемиологиялық талап сақталады. Ата-аналар мен мұғалімдерге ҰБТ өткізу пунктінің аумағында болуға тыйым салынады. Олар үшін аудиториядан бейнетрансляция қамтамасыз етіледі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.