Сенбі және жексенбі күндері Ақтау қаласындағы «Теннис орталығында» дзюдодан Тұрар Жолдыбаевты еске алуға арналған халықаралық турнир өтті. Ерлер мен әйелдер арасында ұйымдастырылған жарысқа Қазақстан, Ресей, Өзбекстан, Грузия, Әзірбайжан, Жапония, Франция Қырғызтан және Тәжікстан мемлекеттерінен келген 341 балуан қатысып, боз кілемде белдесті.
Дүбірлі доданың ашылу салтанатына Қазақстан дзюдо федерациясының бірінші вице-президенті Марат Мықтыбеков, Қазақстан ерлер құрама командасының аға жаттықтырушысы Ермек Имамбеков, Қазақстан әйелдер құрама командасының аға жаттықтырушысы Жексенбай Саламатов, Олимпиаданы даярлау орталығының директоры Оспан Жаңбырбаев, Рио Олимпиадасының күміс жүлдегері Елдос Сметов, Ақтау қаласының әкімі Серікбай Трұмов, Маңғыстау облыстық дзюдо федерациясының президенті Самат Мұсабаев қатысып, жарысқа қатысушыларға сәттілік тіледі.
- Облыс орталығында жыл сайын белгілі фермер Тұрар Жолдыбаев атындағы турнирді ұйымдастыру дәстүрге айналған. Бұл жарыстың жыл санап географиялық ауқымы кеңейіп, мәртебесі өскіп келе жатқаны бізді қуантады. Турнирдің жоғары деңгейде ұйымдастырылуына спортқа жаны ашитын белгілі азаматтарымыздың үлес қосып жүргенін айтып кетуіміз керек. Тәуелсіздіктің 25 жылдығына орай қаламызда Тұрар Жолдыбаев атындағы спорт кешенінін пайдалануға берілгенін білесіздер. Мұның барлығы облыста спорттың дамуына айтарлықтай үлесін қосатынын, дзюдо күресімен айналысатын жастарға жасалып отырған үлкен қамқорлық екенін біз қуана қабылдаймыз. Сондықтан да мұндай игі бастамалар алдағы уақытта да жалғасын таба берсе екен деген тілектеміз... Құрметті жерлестер, жарыстың қонақтары спорт-бірлікті, достықты насихаттайтын үлкен жиын. Барлығыңызға сәттілік тілеймін, нағыз мықты балуандар жеңіс тұғырынан көрінсін, - деді шараның ашылуында сөз алған қала басшысы Серікбай Трұмов.
Ел Тәуелсіздігінің 25 жылдығына орай биыл сегізінші рет ұйымдастырылып отырған турнир аясында Маңғыстау облыстық дзюдо федерациясының атынан Қазақстан ерлер құрама командасының аға жаттықтырушысы Ермек Иманбеков пен Қазақстан әйелдер құрама командасының аға жаттықтырушысы Жексенбай Саламатовқа 250 мың теңгенің сертификаты табысталды. Сонымен қатар, ел намысын байрақты бәсекелерде қорғап, ел мерейін асқақтатып жүрген Рио Олимпиадасының күміс жүлдегері, ұлт мақтанышы Елдос Сметовқа 1 миллион теңгенің сертификаты берілді.
- Сегіз мемлекеттің басын біріктіріп, мұндай кең ауқымда турнир ұйымдастыру да оңай емес. Сондықтан да осы істің басы-қасында жүрген барлық азаматтарға алғыс айтқым келеді. Бұл турнирде ең мықты балуан жеңіске жетіп, ел мәртебесін биіктетсін дегім келеді. Көрермендерге әсерлі күрестің куәгері болуларына тілектеспін, - дейді Қазақстан дзюдо федерациясының бірінші вице-президенті Марат Мықтыбеков.
Екі күн бойы Ақтау қаласындағы «Теннис орталығы» жанкүйерлерге лық толып, дзюдо күресімен тыныстады. Екінші күні турнирдің шымылдығын ашып, түндігін түрген балуандарымыз жерлестеріне 2 алтын және 4 қола медальдарды сыйлады. Жүректілер мен білектілердің айқасында 73 келі салмақта Елдос Жұмаханов («Қарагөз» спорт мектебі) мен 57 келі салмақта Анна Казюлина («Қарагөз» спорт мектебі) алтынмен апталып, жарыс жеңімпазы атанды. Сонымен қатар, 60 келі салмақта Мейрам Әбіл («Толқын» спорт мектебі), 90 келі салмақта Мейрамбек Жаңабай («Қарагөз» спорт мектебі), 70 келі салмақта Ақниет Тұрдан («Жастар» спорт мектебі), 57 келі салмақта Кәмшат Қарасайқызы (Шетпе ауданы) үшінші орынды қанағат тұтып, қола медальдардың иесі атанды.
-Дзюдомен 5 жылдан бері айналысамын. Биылғы жылы ақпан айында Өскеменде жастар арасында өткен ҚР чемпионатында қоланы еншіледім. Сол жеңісімді де осы халықаралық турнирде қайталадым. Шешуші сәтте алматылық балуанға есемді жібердім. Бұл жолы да еншіме қола медаль бұйырды. Жарысқа дайындаған бапкерім Сергей Волобуевқа алғыс айтамын,-дейді «Жастар» спорт мектебінің дзюдошысы Ақниет Тұрдан.
Халықаралық турнир қорытындысы бойынша командалық есепте 2 алтын, 2 күміс, 7 қола медальдармен Қызылорда облысы бірінші орынды иеленді. Екінші орынға 2 алтын, 2 күміс, 2 қола медальдармен Оңтүстік Қазақстан облысы тұрақтады. Үшінші орынды Маңғыстау облысы мен Әзірбайжан мемлекеті өзара бөлісті.
Венера МИРЛАН Суреттерді түсірген Талант ҚҰСАЙЫН
[gallery td_select_gallery_slide="slide" ids="10408,10403,10405"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
