Ақтаудағы «Аққу-3» тұрғын үйі жыл соңында пайдалануға беріледі

Ақтауда 33 шағынауданда орналасқан «Аққу-3» тұрғын үйдің құрылысы жыл соңына дейін аяқталады деп жоспарланған. Бұл туралы Ақтау қалалық құрылыс бөлімінің басшысы Эльдар Машырықов мәлімдеді.

«Ақтауда «Нұрлы жер» бағдарламасы аясында бірнеше көппәтерлі тұрғын үй салынып жатыр. Атап айтсақ, 33 шағынауданда 670 пәтерден тұратын «Аққу-3» тұрғын үйінің құрылысы жүргізілуде. Құрылыс жұмыстары жыл соңына дейін аяқталып, пайдалануға беріледі деп жоспарланып отыр», - деді бөлім басшысы.

Бұдан бөлек, 19 А шағынауданда 576 пәтерлі 7 тұрғын үй салынып жатыр. Оның ішінде жалпы ауданы 7 847,32 шаршы метрді құрайтын №37 жер учаскесіндегі 2 тұрғын үй тамыз айында пайдалануға берілмек. Ал осы жылы қалған №41 учаскедегі бес тұрғын үйдің құрылысы басталды. Құрылыс жұмыстары 2021 жылы аяқталып, пайдалануға берілмек.

«18 шағынаудан бойынша барлығы 396 пәтерлі 8 тұрғын үй тұрғызылады. Оның ішінде №58 учаскесінде төрт тұрғын үйдің құрылысы биыл басталды. Пайдалануға 2021 жылы беріледі. Осы шағынаудандағы №25 және №28 учаскеде салынады делінген төрт тұрғын үйдің құрылысына қажетті қаржы республикалық бюджеттің нақтылауына ұсынылды», - дейді Ақтау қалалық құрылыс бөлімінің басшысы Эльдар Машырықов.

Сонымен қатар 19 шағынауданда 260 пәтерлі 4 тұрғын үй, 2015 жылы 130 пәтерлі екі тұрғын үйі пайдалануға берілді. Қалған 2 тұрғын үйдің құрылысын аяқтау мақсатында қазіргі таңда жобалық сметалық құжаттамасы толықтай жасақталып, сараптамада қаралуда.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.