Р.Бектубаев: «Сын сағатта медициналық қызмет себепсіз үзілмеуі тиіс»

Әлеуметтік медициналық сақтандыру қорына аударымдар немесе жарналар түсірмеген азаматтардың міндетті әлеуметтік медициналық сақтандыру жүйесінде медициналық көмекті алу құқығы 2020 жылдың 1 шілдесіне дейін ұзартылды. «Әлеуметтік медициналық сақтандыру қоры» Маңғыстау филиалының директоры Руслан БЕКТУБАЕВПЕН өткен сұхбатымызда осы мәселе әңгіме арқауы болды.

- ҚР Президентті Қ.Тоқаев әлеуметтік медициналық сақтандыру жүйесінде қазіргі төтенше жағдайға орай өзгерістер болатынын айтқан болатын. Қиын кезде көпшіліктің көкейіне қона кеткен осынаужағымды жаңалық туралы кеңірек тоқтала аласыз ба?

- Әлеуметтік медициналық сақтандыру қоры 2020 жылдың 1 сәуірінен бастап МӘМС-ке толық көшу үшін қажетті дайындық жұмыстарын жүргізді. Алайда, қазіргі жағдайды ескере отырып, Мемлекет басшысының тапсырмасы бойынша сақтандырылмаған азаматтардың міндетті әлеуметтік медициналық сақтандыру жүйесінде медициналық көмекті алу құқығы 2020 жылдың 1 сәуірінен 1 шілдесіне дейін ұзартылды. Бұл туралы ҚР Президенті Қасымжомарт Тоқаев соңғы мәлімдемесінде атап өтті. Мұны дер кезіндеқабылданған оңтайлы шешім деп есептеймін.

- Демек, азамат сақтандыру жүйесіне қатыспай-ақ, кез келген медициналық қызметті тегін ала береді ғой?

- Иә, Президенттің осы тапсырамасына сәйкес, 1 шілдеге дейін Маңғыстау облысында медициналық көмек азаматтарға бұрынғыдай қолжетімді болып қала береді. Яғни, бүгінге дейін мәртебесі анықталып, сақтандырылған азаматтармен қатар, сақтандырылмағандар да денсаулық сақтау саласындағы барлық қызметті пайдалана алады. Өйткені, қазіргі уақытта өңір тұрғындарына дәрігерлердің қызметі аса қажет екені айтпаса да түсінікті. Қауіпті індетпен күресте барлық медициналық қызмет қолжетімді болуы тиіс екендігін Мемлекет Басшысының қатаң тапсыруы өте орынды.

- Қауіпті індет кезінде дәрігерлерге де мүмкіндік қарастырыла ма?

-Бүгінде барлық медицина қызметкерлерінің жұмыла еңбек етіп жатқанын білесіздер. Олар–расымен де бүгінгінің нағыз батырлары. Өйткені, олар өз отбасыларынан алыстап, күні-түні адам өміріне араша түсуде. Сондықтан, Президент айтқандай, қазіргі уақытта оларға қандай қолдау көрсетсек те әбден лайық. Осы орайда дәрігерлерге және медицина қызметкерлеріне 3 ай бойы қосымша үстеме ақы төленеді. Бұл туралы кеңірек ҚР Денсаулық сақтау министрі Е.Біртанов мәлімдеді. Медицина қызметкерлерінің өмірін сақтандыру мәселесі де назардан тыс қалмай шешімін тапты.

- Елімізде сақтандырылмаған азаматтар көп пе?

- Өлкемізде көп емес. 2 сәуір күнгі облыстық жұмыспен қамтуды үйлестіру және әлеуметтік бағдарламалар басқармасы келтірген дерек бойынша, Маңғыстауда 7311 адамның статусы анықталмаған, яғни өзектендірілмеген. Жалпы алғанда, елімізде шамамен 16,4 миллион адам сақтандырылған. Оның ішінде 11 миллионға жуығы–әлеуметтік осал топтардың өкілдері. Олар үшін жарналарды мемлекет төлейді. Осылайша, ел халқының жартысынан көбі автоматты түрде сақтандырылған.

-МӘМС жүйесінің артықшылықтары қандай?

-Қазақстанда МӘМС жүйесі биылғы 1 қаңтардан бастап іске қосылды. Өткен кезеңнің қорытындылары бойынша бұрын ақылы болып есептелетін компьютерлік томография/MРТ, ультрадыбыстық қызметтерді тұтынудың өсуі байқалады. Сондай-ақ, оңалту және қалпына келтіру емдеріне де сұраныс бар.Қарапайым халықтың қалтасына ауыр тиетінбарлық қымбат тұратын қызметтер тегін жүріп жатыр. Қор пациенттердің құқығын қорғауға бағытталғандықтан, медициналық ұйымдардың көрсеткен қызметтерінің сапасын тексергеннен кейін ғана, олар бойынша ақысын төлейді.

- Сонымен, 1 шілдеге дейін берілген уақытта тұрғындар нені ескеруі тиіс?

- Жеңілдік кезеңінде әр азамат өзінің сақтандыру мәртебесін анықтап, жарналарды төлеп, МӘМС қатысушысы болуы тиіс. Мысалы, адам жұмыстан шығып қалды делік. Жұмыс беруші ол үшін жарна төлеуді де тоқтатады. Мұндай жағдайда ол алдағы 3 ай бойы МӘМС пакетін пайдалана алады. 3 айда жарна төленбесе, жүйеден шығарылады. Биыл жарна төлеуге еш мүмкіндігі болмаған азаматтар жарнаны кез келген уақытта төлеп, сақтандыру жүйесіне қатыса алады.

- Сұхбатыңызға рахмет. Елімізде төтенше жағдай мерзімі ұзармай, қалыпты жағдайға тезірек оралуымызды тілейік.

Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.