Маңғыстау облыстық самбо федерациясы президентінің бұйрығымен өңірлік самбо федерациясының спорттық директоры ретінде халықаралық дәрежедегі спорт шебері Жұбатқан Сұңғат Манарбекұлы тағайындалды, деп хабарлайды Mangystaumedia.kz өңірлік самбо федерациясының баспасөз қызметіне сілтеме жасап.
Байрақты бәскелерде топ жарып, еліміздің көк байрағын өзге елде көтеріп, әнұранымызды шырқатып жүрген спортшылардың бірі - Сұңғат Жұбатқан 1998 жылы Маңғыстаудың Шетпе ауылында дүниеге келген.
Ол дзюдадан Азияның, Еуропаның, Қазақстанның бірнеше дүркін чемпионы. Дүниежүзілік универсиада ойындары мен әлем кубогының қола жүлдегері, сондай-ақ халықаралық дәрежедегі спорт шебері. Самбодан ҚР чемпионатының бірнеше дүркін чемпионы және Азия чемпионы. Әлем чемпионатының күміс және қола жүлдесінің иегері.
Маңғыстау облыстық самбо федерациясының атқарушы директоры Асхат Қапанов Сұңғат Жұбатқанға самбо федерациясының спорттық директоры екенін растайтын құжатты табыстады.
Сондай-ақ, ҚР самбо федерациясының құрылтайшысы, өңірлік самбо федерациясының президенті мен вице-президенті Сұңғат Жұбатқанды жаңа қызметімен құттықтап, жұмысына сәттілік тілеп, берілген тапсырмаларды абыроймен атқаратынына сенім білдірді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
