Бүгін бірнеше министр қызметінен кетті

Бүгін мемлекет басшысының жарлығымен бірнеше министр өз қызметінен босатылды, - деп хабарлайды mangystaumedia.kz сайты.

Алдымен Мемлекет басшысының Жарлығымен Ғалымжан Тельманұлы Қойшыбаев Қазақстан Республикасы Премьер-Министрінің орынбасары – Үкімет Аппаратының Басшысы лауазымына тағайындалды.

Ал Серікқали Аманғалиұлы Брекешев Экология, геология және табиғи ресурстар министрі лауазымынан босатылды. Оның орнына Зүлфия Болатқызы Сүлейменова тағайындалды.

Сонымен қатар Оқу-ағарту министрі болған Асхат Қанатұлы Аймағамбетов та қызметінен кетті. Енді елдің бас ұстазы Ғани Бектайұлы Бейсембаев болды.

Мемлекет басшысының жарлығымен Марат Кәрімжанұлы Қарабаев Қазақстан Республикасының Индустрия және инфрақұрылымдық даму министрі лауазымына тағайындалды. Бұған дейін бұл қызметті Қайырбек Айтбайұлы Өскенбаев атқарған еді.

Сонымен қатар Дәурен Әскербекұлы Абаев Қазақстан Республикасының Мәдениет және спорт министрі лауазымынан босатылып, оның орнына Асхат Раздықұлы Оралов тағайындалды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.